Алматы облысының аумағындағы Үлкен Алматы айналма автокөлік жолымен (ҮАААЖ) жүру бүгіннен бастап ақылы болады.
Индустрия және инновациялық даму министрлігінің ҮАААЖ учаскесін ақылы түрде пайдалану туралы бұйрығына сәйкес, енді қанша қашықтықты жүргеніне қарамастан, бір сағат ішінде жол жүру құны жеңіл көліктерге 0,07 айлық есептік көрсеткіш (АЕК) немесе 241,5 теңге, 16 жолаушыға дейін тасымалдайтын автобустарға және 2,5 тоннаға дейін көтеретін жүк көліктеріне 0,08 АЕК (276 теңге), 32 жолаушыға дейін тасымалдайтын автобустар мен 5,5 тоннаға дейін көтеретін жүк көліктеріне 0,14 АЕК (483 теңге), 32 жолаушылық орындығы бар автобустар мен 10 тоннаға дейін жүк көтеретін көліктері 0,16 АЕК (552) ақы төлейді. Ал 10 тоннадан 15 тоннаға дейін жүк көтеретін көліктерге 0,2 АЕК (690 теңге), 15 және одан көп жүк көтеретін көліктері, оның ішінде тіркемесі бар жүк көтергіш тракторларға 0,22 АЕК (759 теңге) төлем белгіленген.
Сонымен қатар, аталған жолда жүруге бір айға және бір жылға жеңілдетілген түрде абонемент сатып алу болады.
Үлкен Алматы айналма автомобиль жолы маусымның ортасында пайдалануға берілді. Ұзындығы 66 шақырымға созылатын I-А санатты жолдың екі бағытында үш жолақтан бар. Жалпы саны алты жолақ болатын ақылы автомобиль трассасында сағатына 120 шақырыммен жүруге рұқсат етілген.
