Алматы әкімдігі қала маңындағы елдімекендердің тұрғындарын қоғамдық көлікпен қамтамасыз ету үшін қала маңына қатынайтын 10 жаңа маршрутты іске қосуды жоспарлап отыр. Алматы әкімдігінің мәліметінше, жаңа бағыттар қала шегінен 50 шақырым радиуста орналасқан Алматы облысының Талғар, Іле, Қарасай, Жамбыл аудандарындағы бірқатар елді мекенді қамтиды.
Атап айтқанда, қоғамдық көліктер Жетісу базары – Дәулет кенті, «Алматы 1» теміржол вокзалы – Туғанбай кенті, Нұра, «Алматы 2» теміржол вокзалы – Тұздыбастау кентіндегі «Сұлтан» кешені, «Райымбек батыр» метро бекеті – Еламан кенті, «Саяхат» автовокзалы – Қараой кенті, «Сәлем» базары солтүстік айналма – Исаев кенті, «Адем» сауда үйі – Батыр кенті арасында қатынайды. Сонымен бірге, Төле би-Яссауи көшелерінің қиылысынан Қарғалы, Шамалған, Мыңбаев елді мекендеріне қарай бірнеше бағыт бойынша автобус жүреді. Сонымен қатар биыл №9 жаңа қалалық маршрут іске қосылып, №97 және №89 екі жаңа маршрут ашылады деп жоспарланып отыр. Жаңа маршруттарға әлеуметтік маңызы бар қатынастарға және халыққа қоғамдық көлікте жол жүруді қолжетімді ету ету мақсатында субсидия бөлінеді.
Айта кетейік, «Алматы қаласын дамытудың 2025 жылға дейінгі бағдарламасы мен 2030 жылға дейінгі ортамерзімді перспективасына» сәйкес, 2024 жылдың соңына дейін Алматы қаласының әкімдігі қала маңында 30 жаңа маршрут ұйымдастыруды жоспарлап отыр.
