Астанада өткен баспасөз мәслихатында Индустрия және инновациялық даму министрлігі Құрылыс және тұрғын үй-коммуналдық шаруашылық істері комитеті кейінгі 10 жылда елімізде үй кезегіне тұрған азаматтар саны 6 есеге артып, қазіргі күні елімізде 646 819 адамға жеткенін хабарлады.
Комитет төрағасының орынбасары Бауыржан Қабдолдың айтуынша, кезектегі 232 мыңға жуық адам үй кезегіне тұру талаптарына сай келмейді.
«Халықтан аталған кезекке баспанасы бар азаматтардың да тұрып жатқаны туралы көптеген шағым түсіп жатыр. Осыған байланысты біздің ведомство Цифрлық даму, инновациялар және аэроғарыш өнеркәсібі министрлігімен бірлесіп, аталған тізімнің заң талаптарының сәйкестігіне талдау жүргізді. Оның нәтижесінде кезекте тұрған 96,1 мың азаматтың кейінгі 5 жылда жеке баспанасы болғаны, 533 адамда Қазақстанның азаматтығы жоқ екені, 91,4 мыңға жуық адамның тұрғылықты жері кезекке тіркелген өңірмен сәйкес келмейтіні, сондай-ақ 29 мың адамның тіркелмегені және 15,6 мың адамның қайтыс болғаны анықталып отыр», – деді Бауыржан Қабдол.
Ол осыған байланысты үй кезегінде тұрған 232 мыңға жуық азаматты тізімнен шығару керектігін айтты. Оның сөзінше, аталған тізімді түгендеу кезектің алға жылжуын жеделдетуге және баспанаға шын мұқтаж азаматтардың құқықтарын кез-келген заңға қайшы әрекеттерден қорғауға мүмкіндік береді.
