1 шілдеден бастап Азаматтық хал актілерін тіркеу (АХАТ) функциялары «Азаматтарға арналған үкімет» мемлекеттік корпорациясына өтті. Ал қызмет көрсету стандарттары, оларды қарау тәртібі мен мерзімі өзгеріссіз қалды. Сондай-ақ, электрондық үкімет порталы арқылы онлайн өтініш беру мүмкіндігі сақталды. Бұл туралы өңірлік коммуникациялар алаңында «Азаматтарға арналған үкімет» мемлекеттік корпорациясы коммерциялық емес акционерлік қоғамы Алматы облысы филиалы директорының орынбасары Талғат Бектұрсынов мәлімдеді.
Естеріңізге сала кетейік, АХАТ органдары туғаны, қайтыс болғаны және неке қию, некені бұзу сияқты құжаттарды тіркейді. Бұдан басқа, тіркеуші органдар акт жазбаларына өзгерістер, толықтырулар мен түзетулер енгізеді, азаматтық хал актілерінің жазбаларын қалпына келтіреді және жояды.
– Жас жұбайлар бұрынғысынша АХАТ арқылы некеге тұруға өтініш бере алады. Одан бөлек, өтінімдерді электрондық үкімет порталы арқылы онлайн беруге болады. Өтініш неке қию күнінен 15 күн бұрын берілуі керек. Сонымен қатар жас жұбайлар өтініш берген кезде некені салтанатты түрде немесе әдеттегі түрде қию жолдарын таңдайды. Қазіргі таңда Еңбекшіқазақ ауданы және Талғар қаласында салтанатты түрде тіркеу залдары бар, – деді Еңбекшіқазақ аудандық азаматтық хал актілерін тіркеу бөлімінің басшысы Гүлжаухар Құлжабаева.
Спикердің айтуынша, аймақта екі айда неке қиюға 1100-ден аса азамат өтінім берген болса, заңды ажырасуға 200-ден аса өтініш түскен.
Некеге тұрғысы келетіндер тіркеуші органға жеке басын куәландыратын құжаттарын ала баруы керек. ХҚКО операторлары мен мемлекеттік корпорацияның басқа да қызметкерлері АХАТ ақпараттық жүйесін қолдана алмайды. Сондықтан АХАТ қызметтерін тек тіркеуші орган мамандары көрсетеді.
Естеріңізге сала кетейік, АХАТ органдары ақылы да, тегін де қызметтер көрсетеді. Әлеуметтік маңызы бар қызметтерді, атап айтсақ, туу мен өлімді тіркеу тегін болып қалды. Ақылы қызметтердің тарифі қосалқы құн салығымен қоса есептелген.
Гүлзат Байқонысова,
Қонаев қаласы
