Баршамызға белгілі, 1990 жылы 25 қазанда Қазақстанның егемендігі туралы декларация қабылданған. Бұл еліміздің тәуелсіздік жолындағы тұңғыш қадамы болатын. Мемлекет басшысы Қасым-Жомарт Тоқаев 2022 жылдан бастап Республика күнін қайтаруды ұсынды. Президентіміз оған “ұлттық мереке” мәртебесін беріп, Қазақстанның басты мейрамы ретінде атап өту туралы бастама көтерген еді.
Қазанның 25-і елімізде Республика күні болып белгіленуінің маңызы зор деп айтар едім. Бұл күні мемлекетіміз үшін де, оның халқы үшін де үлкен мереке. Кең байтақ отанымыздың барлық қаласы мен ауылдарында мерекеге арналған әр түрлі іс-шаралар ұйымдастырылады. Бұл Қазақстан азаматтарының елге, отанға деген сүйіспеншлігін арттырады. Өйткені мен сияқты жастардың өз еліне деген құрметі осындайдан бастау алады деп ойлаймын. Республика күні кейінгі екі жылдан бері жер-жерде қайтадан тойлана бастағанын қуана құптаймын.
Әрбір жетістік маңдай термен төгілген ынта-жігердің арқасында келеді. Мақсатымыз – еліміздің жарқын болашағы үшін еңбек ету! Сонда ғана Қазақстан болашақта бай-қуатты мемлекетке айнала алады. Біз Жаңа Қазақстанның болашағымыз! Баршаңызды қазақ халқының сан ғасырлық армандаған ұлттық мерекесі – Республика күнімен құттықтаймын!
Әнуарбек Абдулқасымов,
жас маман-теолог, Жамбыл ауданының тұрғыны
