Ұрпақты білім нәрімен сусындатып, ұлтымыздың ұйытқысы, жаңалықтың жаршысы болар кейбір ұстаздар қауымының адасуы Жаңа Қазақстан құрамыз деп жүрген қоғамға таудай кедергі тудыратыны айтпаса да түсінікті. Өзі қызмет ететін, өзі тұрып жатқан облысында атқарылып жатқан игілікті істер мен ауқымды шараларды оқушыларға, айналасындағы жұртшылыққа жеткізетін ұлттың айнасы ұстаздар емес пе еді?! Мұғалімдер облыстық басылымға жазылудан бас тартса, ғаламтордағы ала-құла ақпаратқа еріп кетсе, болашағымыз не болғаны? Мұғалім адасса, қарапайым халық қайда бармақ?
Бұл – менің облыстық «Алатау арайы» газетінде жарық көрген «Талғар ауданы «рекорд» жасады» деген мақаланы оқығаннан кейін түйген ойым. Сол ұстаздарға шәкірттері Қонаев пен жаңадан құрылып жатқан Алатау қаласының болашағы жөнінде сұрақ берсе, не жауап берер еді? Ғаламторын ақтарып, ресми мәлімет таппай, қиналып отыра ма? Менің білетінім, әрбір ұстаз өзі ғана баспасөзге жазылып қоймай, әріптестерінің, оқушыларының, ауыл тұрғындарының күнделікті сауат ашып, басылымнан қол үзбеуіне ықпал етуі керек қой. «Талғар ауданы бойынша облыстық «Алатау арайы» газетіне 50 адам ғана жазылған» делініпті мақалада. Сұмдық қой! Ұрпақ алдында ұятты тірлік!
Мысалы, мен сол 50-дің бірі болғанымды мақтан тұтамын. Сонау 70-жылдардан бері «Жетісу» газетін үзбей жаздырып келіп, Алматы облысы екіге бөлініп, жаңадан «Алатау арайы» басылымы шыққалы оның да тұрақты оқырманы болып жүрмін. Бұл жерде баспасөзге жазылуға қолдау көрсетуде тек қана мұғалімдердің емес, жергілікті әкімдердің де кінәсі бар деп білемін.
Бір ғана Талғар ауданында 12 ауылдық округ бар. Оның әрқайсында кемінде 10-нан мемлекеттік қызметкер еңбек етеді. Егер осы аталған мамандардың өзі облыстық газетке жазылса, Талғар ауданы бойынша 50 емес, 120 болар еді-ау!
Айналайын, халқым, ел тізгінін ұстаған азаматтар мен ұлтымыздың ұйытқысы – ұстаздар! Жаңалықтын жаршысы, облыстың айнасы, төл басылымымыз – «Алатау арайына» жазылуды ұмытпаңыздар! Рухани байлық ақшада емес екенін жадымыздан шығармайық!
Етекбай Шәкібаев, зейнеткер,
Талғар ауданы
