Биыл Кеңес әскерінің Ауғанстан жерінен шығарылғанына 35 жыл толды. Осыған орай Есік қаласындағы Т.Молдағалиев атындағы Мәдениет үйінде ардагерлер бас қосты. Шараға Ауған соғыс ардагерлері, қаза тапқан майдангерлердің жақындары мен колледж студенттері қатысты.
Он жылға созылған қанқұйлы соғысқа Қазақстаннан аттанған 22 мыңнан астам адамның 761-і ұрыс даласында қаза тауып, 21 жауынгер із-түзсіз жоғалып кетті.
– Биыл Кеңес әскерінің Ауғанстан жерінен шығарылғанына 35 жыл толып отыр. Бұл атаулы күн мыңдаған шаңыраққа орны толмас қайғының ізін қалдырып, талай боздақтың өмірін қыршыннан қиған қасіретті соғыстың аяқталуын еске түсіреді. Бүгінде Ауған соғысының от-жалынында шыңдалған ардагерлердің бірі жас ұрпаққа әскери-патриоттық тәрбие берсе, енді бір тобы шағын және орта бизнес саласында ауданымыздың экономикалық-әлеуметтік дамуына үлес қосуда. Осы орайда сіздерге болашақ ұрпақты, жастарды елжандылыққа тәрбиелеу ісіндегі қызметтеріңіз үшін шынайы ризашылық білдіремін, – деді ардагерлерді айтулы күнмен құттықтаған Еңбекшіқазақ аудандық ішкі саясат бөлімінің басшысы Дархан Ахметов.
Жиын аясында 30-дан астам ардагерге мерекелік медаль мен аудан әкімдігінің, сондай-ақ ҚР Ұлттық ұланы №6654 әскери бөлімі мен аудандық қорғаныс мекемесінің Алғыс хаттары табысталды. Шара соңы коцертке ұласып, патриоттық әндер шырқалды.
Ерзат Асыл,
Еңбекшіқазақ ауданы
