Қазақстан Республикасы Президентінің Кеңесшісі Мәлік Отарбаев Еңбекшіқазақ ауданына жасаған жұмыс сапары аясында Шелек өңірінің ардагерлерімен, дін қызметкерлері және жастармен кездесті.
Ең әуелі Мәлік Нұржанұлы Шелек өлкетану мұражайына атбасын тіреп, өңірдің өткенімен танысты. Мұражайдағы жәдігерлерді көзбен көрген Президент кеңесшісі музей қорының мол екендігін айтты. Алайда, музей кызметін жетілдіру керектігін тілге тиек етті.
Келесі қадамда Мәлік Нұржанұлы Шелек өңірінің ардагерлерімен кездесті. Жасында бейнет етіп, бүгінде зейнетін көріп отырған ел ағалары ауданда атқарылған әр іске ақылын айтып, бағасын беріп, ауданның өсіп-өркендеуіне зор ықпалын тигізуде. Кездесуде Шелек өңірінің ардагерлері өзін толғандырған мәселелерді ортаға салды. Олар Президент кеңесшісіне кей ауылдарда әлеуметтік нысандар бой көтерсе, елдімекендерде жұмыс орны ашылса деген өтініштерін жеткізді. Өз кезегінде Мәлік Нұржанұлы ауылдың қоғамдық өміріне белсене араласып, түрлі салада еңбек етіп, үлгі өнеге болып жүрген ардагерлер қауымына алғысын жеткізді. Сонымен қоса, кездесуде Президент кеңесшісі Мәлік Отарбаев Мемлекет басшысының ауқымды реформалары және Ұлттық құрылтайдағы жан-жақты идеялар мен бастамалары туралы да сөз қозғады. Ол президент бастамаларының қоғамға қозғау салып жатқандығын баяндады.
Мәлік Отарбаев Шелек өңіріндегі сапарында дін қызметкерлерін де назардан тыс қалдырған жоқ. Шелек ауылдық округінің кітапханасында өткен іс-шараны аудан басшысы Т.Байеділов жүргізді. Кездесу барысында Президент кеңесшісі қатысушылармен өзекті мәселелерді, оның ішінде өскелең ұрпақты рухани-адамгершілік бағытында тәрбиелеуді, зерделеу және әртүрлі пәндерді оқыту арқылы мәдениетті тәрбиелеуді талқылады.
Мәлік Нұржанұлы сапар соңын өңір жастарымен кездесумен түйіндеді. Шелек политехникалық колледжінде өткен шарада сөз тізгінін алған Мәлік Нұржанұлы жастарға заман талабынан туындаған қажеттіліктер мен ұлттық құндылықтың басымдығы, жаһанданудың ықпалы мен ұлттық тәрбиенің өзегін ажыратудың маңыздылығы, дұрыс әрі құнды мақсат қоюдың жастарды кәсіби тұрғыдан өсіретінін жіліктеп түсіндіріп берді. Әр адамның басты бағдаршамы кітап болу керектігін баса айтқан Президент кеңесшісі елімізде өткізіліп жатқан саяси науқанға еліміздің жастары да өз үлестерін қосу керектігін түсіндірді. «Кім болашаққа сеніммен қараса, соның болашағы жарқын. Ал кім күмәнмен қараса, оның өмірі де күмәнді, ала-құла күйде өтеді. Сондықтан, келешекке сеніммен қараңыздар», – деген Мәлік Нұржанұлы жас ұрпақтың көздеген мұраты асыл, мақсаты биік болуы керектігін алға тартты. Өз кезегінде жастар көкейінде жүрген сұрақтарын қойып, ой-пікірлерімен бөлісті.
Ерзат Асыл,
Еңбекшіқазақ ауданы
