Еліміздің біраз өңірінде болып жатқан қарғын су тасқыны халқымызды қатты әбігерге салып жатқанын бәріміз көріп отырмыз. Осыған байланысты таяуда ғана Батыс Қазақстан өңіріне арнайы сапармен барып қайтқан Президент Қасым-Жомарт Тоқаев елге үндеу жариялады. Халықты сабырға шақырды.
Бұл енді мемлекет бойынша келіп жатқан табиғи апат. Шындығын айтсақ, болып жатқан жағдай тиісті салаларымыздың төтенше жағдайға дайын еместігін көрсетті. Көз көріп отырған шындық. Дәл қазіргі уақытта береке-бірлік керек. Онсыз жағдайымыз бұдан да қиындай түседі. Сондықтан бірлік керек. Қазіргі ақпараттық технология дамыған заманда оқыс, төтенше жағдайға тап болғанда уақиғадан дер кезінде құлағдар болып отыратын, әр туындаған жағдайға сай әрекет ете алатын күйге жетуіміз керек.
Қазір біздің билер алқасы да халықты ұйымдастыру бағытында жұмыс істеп келе жатыр. Біздің ұйымның көздегені — мемлекетіміздің ұстанып отырған саясатына қолдау көрсетіп, халықтық салт-сана, дәстүр тұрғысынан келіп, заң аясынан аспай, пікір білдіріп, елді ұйыстырып, игі істерге үндеу. Сол тұрғыдан келгенде, біз мемлекет басшысының бүгінгі үндеуі төтеннен, осыншалықты жойқын күшпен келген табиғат апатына күшімізді бірлікпен нығайта отырып еңсеруге шақырған жігерлі үнқату болды деп есептейміз. Біздің ауыл-аймағымыз да қарап қалмай, қаржылай жылу жинап, Ақтөбе облысындағы мұқтаждыққа ұшыраған бауырларымызға жіберді.
Әманда халқымыз аман, жұртымыз тыныш болсын!
Сержан Сейітбаттал,
республикалық қазақ билер алқасы Алматы облыстық филиалының төрағасы
