Қарасай ауданына қарасты Іргелі ауылдық округі аумағында орналасқан «Алтын Орда» әмбебап базарының кәсіпкерлері су басқан аймақтарға қол ұшын созды. Олар Солтүстік Қазақстан облысының орталығы Павлодар қаласына гуманитарлық көмек жинап, аттандырды.
Қазақстан халқы Ассамблеясының кезекті сессиясында Мемлекет басшысы Қасым-Жомарт Тоқаев еліміз бойынша жүзеге асырылып жатқан «Жүректен – жүрекке!» қайырымдылық шарасында қарғын су басқан аймақтарға көмек ретінде жалпы құны 770 млн теңге болатын 1500 тонна азық-түлік пен басқа да қажетті заттар жөнелтілгенін атап айтқан еді. Осындай игі шаралардан «Алтын Орда» әмбебап базарының кәсіпкерлері де шет қалған емес.
Олар жинаған гуманитарлық көмек қорының ішінде түрлі азық-түлік тағамдары, киім-кешек, төсекжай бұйымдары мен жеке гигиеналық, тұрмыстық заттар молынан қамтылған. Нәтижесінде 20 тоннадан асатын гуманитарлық жүк тиелген көлік зардап шеккен ағайындарға жол тартты. Мұның сыртында базар қызметкерлері бір күндік жалақы мөлшерінде қаржылай көмек көрсеткенін де айта кету керек.
– Біз осы қайырымдылық шарасына үлес қосқан барша жұртшылыққа, соның ішінде «Алтын Орда» базарының жетекшілеріне алғыс білдіреміз, – дейді Іргелі ауылдық округі әкімінің орынбасары Ескендір Егеубек. «Күшіміз – бірлікте!» акциясын қолдағандар халқымыздың осы даналық сөзінің дұрыстығын тағы бір дәлелдеп берді.
Бұған дейін «Алтын Орда» базарының кәсіпкерлері мен басшылары Қостанай облысына қарасты Жангелді ауданына, Атырау облысындағы Құлсары қаласына осындай гуманитарлық көмек жөнелткен болатын. Бұл жолғы жүктер алыстағы Петропавл қаласы тұрғындарының игілігіне жаратылатын болады.
Қуат Қайранбаев,
Қарасай ауданы
