Елімізде жарияланған “Таза Қазақстан” экологиялық акциясының аясында Алматы облысында “Мөлдір бұлақ” апталығы басталды. Апталық аясында 6 мамыр күні Қонаев қаласында Қапшағай су қоймасының қаламен шектес жағажайлары қоқыстан тазартылды.
Қонаев қаласының іргесінің қалануы Қапшағай су қоймасының салынуымен тығыз байланысты. Ал шаһардың туристік келбетін қалыптастырушы – Қапшағай мен оның жағасында орналасқан бизнес орындары. Жарты айдан кейін шомылу маусымы басталады. Сондықтан жағажайларды тазалап, ретке келтіру, қажетті инфрақұрылыммен қамтамасыз ету маңызды шаралардың бірі.
Бүгінгі сенбілікке қала әкімі Асхат Бердіхановпен қатар 200 адам қатысып, 8 техника жұмылдырылды. Арамшөп оталып, жолдар мен тротуарлар құмнан тазаланды. Нәтижесінде 10 тонна қоқыс шығарылды.
«Таза Қазақстан» акциясының соңғы апталығы Қапшағайды тазартудан басталды. Еңбек жолымды Шеңгелдіден бастап, зейнетке Қонаевтан шықтым. Сол себепті маған құмының өзі құйма алтыннан қымбат. Жасыма қарамай, тазалық шарасына қатыстым. Барша қазақстандықтарды табиғатты аялап ұстауға, жанашыр болуға шақырамын», – деді Ардагерлер кеңесінің төрағасы Амангелді Беспаев пікір білдіріп.
Айта кетерлігі, қалалық жағажайда шомылу маусымы кезінде 42 кәсіпкер жұмыс істейді. Олар жақын арада өздеріне тиесілі аумақтағы сынған шатырларды қалпына келтіріп, сәкілерін орнатып, ыңғайлы инфрақұрылым жасауы тиіс. Халыққа жоғары деңгейде қызмет көрсету – басты талап.
