Мәдениет және ақпарат министрлігі Дін істері комитетінің қолдауымен 22-26 шілде күндері Республикалық ақпараттық түсіндіру тобының мүшелері Алматы облысына іс-сапар жасады.
Аталған іс-сапар халықтың дінтану бойынша сауатын арттыру және дін саласындағы мемлекеттік саясатты түсіндіру жұмыстарын жүргізу арқылы қоғамда жалған діни идеялардың таралуын болдырмау, діни экстремизмнің алдын алу мақсатында ұйымдастырылды.
Аталған бағытта бас-аяғы 22 іс-шара ұйымдастырылып, 700-ден астам адам қатысты.
Республикалық ақпараттық түсіндіру тобының іс-шараларына – «Нұр-Мүбарак» Египет Ислам мәдениеті университетінің профессоры, аға оқытушы Алау Әділбаев, ҚР ҒжЖБМ Ғылым комитетінің философия, саясаттану және дінтану орталығының директоры, PhD докторы Алмасбек Шағырбай, теология магистрі, сарапшы Жандәулет Cүлейменов, PhD докторы, «Нұр-Мүбарак» Египет Ислам мәдениеті университетінің аға оқытушысы, исламтанушы Нұржан Стамбакиев, Әл-Фараби атындағы ҚазҰУ аға оқытушысы, философия ғылымдарының кандидаты Жанна Қаңтарбаева, Нұр-Мүбарак Египет ислам мәдениеті университетінің аға оқытушы, PhD доктор Түсіпхан Имаммәди қатысты.
Түсіндіру тобының мүшелері Талғар, Есік, Қаскелен қалаларында, сондай-ақ Қарасай, Талғар, Жамбыл, Еңбекшіқазақ, Ұйғыр аудандарында болды. Олар халық арасында «Діни экстремизм мен терроризмнің алдын алу жолдары», «Дәстүрлі құндылықтардың маңыздылығы», «Жастарды тәрбиелеудегі дін мен дәстүрдің рөлі», «Діни тұрақтылық – қоғамдық қауіпсіздіктің кепілі» және басқа да тақырыптарда түсіндіру жұмыстарын жүргізді.
Іс-сапар барысындағы ақпараттық-түсіндіру жұмыстарына түзету мекемесінде жазасын өтеушілер, өзін-өзі жұмыспен қамтығандар, жұмыссыз жастар, ауыл тұрғындары, мешіт жамағаты және басқа да топтар қамтылды.
