Облыс әкімінің орынбасары Нұржан Құдайбергеновтің төрағалығымен жиын өтті. Күн тәртібінде «Жартасты қала – Астана» оқу-жаттығу полигонында Ұжымдық қауіпсіздік туралы шарт ұйымына мүше елдер өкілдерінің қатысуымен өтетін «Скала – 2024» арнайы оқу-жаттығуына, «Қазқұтқару– 2024» жиын-семинарына, Төтенше жағдайлар саласындағы II республикалық еріктілер форумына, Орталық Азия және Таяу Шығыс елдері өкілдерінің ұшқышсыз ұшу аппаратын қолдану бойынша шеберлік-тренингіне дайындық мәселесі қаралды.
Басқосуды ашқан Нұржан Құдайбергенов алдағы уақытта өтетін іс-шаралардың маңыздылығына тоқталды.
– Аталған іс-шараға дайындықты күшейту керек. «Скала – 2024» оқу-жаттығуына Әзербайжан, Беларусь, Өзбекстан, Қырғызстан және Ресей мемлекеттерінен 60-тан астам қонақ қатысады деп жоспарлануда. Өздеріңіз білетіндей, Мемлекет басшысы Қасым-Жомарт Тоқаев құтқару шараларына көп көңіл бөледі. Осы жолы біздің өңірдің барлық құтқарушысы шеберлік-тренингіне қатысады, – деген облыс әкімінің орынбасары оқу-жаттығу және басқа да шараларға жоғары деңгейде қызмет көрсету үшін дайындық барысын пысықтады. Осы мақсатта облыстық экономика және бюджеттік жоспарлау басқармасынан бөлінген қаражатқа мәдениет, архивтер және құжаттама басқармасы тарапынан не істеліп жатқанын сұрады. Аталған басқарманың бөлім басшысы Гүлнұр Домбай басқа елден келетін делегациялар үшін атрибуттар мен кәдесыйлар дайындауды қарастырып, қатысушылар ұлттық безендірумен киіз үй тігу, баспасөз мәслихатына арналған шатыр ұйымдастыру бойынша дайындық жұмысының өз деңгейінде жүріп жатқанын алға тартты. Кеген ауданының әкімдігі киіз тігуді мойнына алды.
Облыстық санитариялық-эпидемиологиялық бақылау департаменті тарапынан судың санитарлық нормаға сәйкестігі үнемі тексеріліп, полигонда зиянкестерге қарсы өңдеуге және оқу-жаттығуларға қатысушылар үшін жағдайларды қамтамасыз етуге ерекше назар аударылады. Басты мәселелердің бірі – полигонға апаратын жолды ретке келтіріп, интернетпен қамтамасыз ету. Аталған шараларды өткізуге бір айдай уақыт қалғанын, екі ай бұрын облыс әкімі халықаралық оқу-жаттығуларға дайындық жоспарын бекіткенін еске салған Нұржан Кеңесұлы алайда оған дайындықтың баяу жүріп жатқанын сынға алды. Жақында өзі полигонға барып, әзірлік жұмысын көзбен көретінін айтты. Сонымен бірге жиында іс-шараларды ақпараттық сүйемелдеу және ретро-мұражайға баруды қамтитын қонақтарға арналған мәдени бағдарламаны ұйымдастыру мәселесі талқыланды.
Айжарық Көптілеуов
