Алматы облысының прокуратурасы Шерзат Полаттың өліміне қатысты іс бойынша сотқа дейінгі тергеудің аяқталуға жақын екенін хабарлады.
Ведомствоның мәлімдеуінше, қажетті тергеу әрекеттері жүргізіліп, барлық күдікті ұсталды.
“Қазіргі уақытта сараптама нәтижелері күтілуде. Сараптама қорытындысынан кейін іс процестің қатысушыларына танысу үшін беріледі. Сонымен қатар Қ. Нұрымовтың үйін өртеу және Н. Ғайыпбаевтың өз-өзіне қол жұмсауы бойынша қылмыстық істердің тергелуі Бас прокуратураның бақылауында екенін хабарлаймыз”, деп атап өтті прокуратурадан.
Еске салайық, 4 қазанда Талғар қаласында дүкенде болған жанжал төбелеске ұласып, Шерзат Полат есімді жасөспірім қаза болған.
Алматы облысының Прокуратурасы кісі өлтіру туралы бұл іс ерекше бақылауға алынғанын ресми түрде хабарлады. Қазір іс Ішкі істер министрлігі мен Бас прокуратураның бақылауында.
12 қазан түнде қара жамылған отбасының үйі өртеніп кетті. Алматы облысының Полиция департаменті бөтеннің мүлкін қасақана жою фактісі бойынша іс қозғады.
Прокуратура соттың ашық өтуін сұрайтындарын жеткізді.
ҚазАқпарат
