Балалардың білім мен ғылымға қызығушылығын арттырып, болашаққа нық қадам басуына ауыл мектептері оқушыларына арналған республикалық олимпиаданың алар орны ерекше. Жарыс жеңімпаздары еліміздің үздік мектептерінде білімін жалғастыруға, сондай-ақ жоғары оқу орындарының грантын иеленуге мүмкіндік алады.
Биыл өңірден білім сайысына 15 525 оқушы қатысуға ниет білдірген. Республикалық кезеңге жолдама алған 63 баланың 41-і жүлделі орындардан көрініп, ІІ республикалық олимпиаданың қоғамдық-гуманитарлық бағыты бойынша Алматы облысының командасы алға шықты.
«Білекті бірді, білімді мыңды жығатынын» дәлелдеп, білім сайысында үздіктер қатарын толықтырған оқушылар мен олардың ата-аналарын, олимпиадаға дайындаған мұғалімдерін Еңбекшіқазақ ауданының әкімі Талғат Байеділов қабылдап, жеке кездесу өткізді.
«Еңбекшіқазақ ауданы – халық саны жағынан алдыңғы қатардағы аудандардың бірі. Бүгінде бізде 55 мыңнан астам оқушы бар. Балалардың сапалы білім алуы, заманға сай мектептердің бой көтеріп, саны артуы үшін қолдан келген шаруаны жасап жатырмыз. Биылдың өзінде жеке инвесторлардың қаражатымен ауданымызда үш мектеп қолданысқа берілді», – дей келе аудан әкімі білімді ұрпақ тәрбиелеп отырған ата-аналарға және ауданның ғана емес, облыстың абыройын асқақтатқан оқушыларға Алғыс хат пен арнайы сертификат табыстады.
«Ұстаздармен бірлесе жұмыс атқарып, балаларыңызға оң бағыт-бағдар беріп, әрдайым қолдау көрсеткендеріңіз үшін алғысым шексіз», – деген аудандық білім бөлімінің басшысы Арайлым Төлеубекова ата-аналарға құрметін білдіріп, оқушыларды жеңісімен құттықтады.
Құралай МҰРАТҚЫЗЫ,
Еңбекшіқазақ ауданы
