Тығыз қоныстанған Қарасай ауданының тұрғындары үшін электрмен үздіксіз қамту – маңызды мәселе. Әсіресе ірі кәсіпорындар мен жылыжайлар орналасқан Елтай ауылдық округінде бұл жайт өзектілігін жоғалтқан жоқ. Электрмен қамтамасыз ету – бизнестің өркендеуіне, осы арқылы жалпы аудан экономикасының дамуына тікелей әсер етеді.
Қарасай аудандық электр жүйесінің басшысы Айдар Оспановтың айтуынша, қазіргі туындап отырған қиындыққа – өңірдегі электр желілерінің 70 пайызға тозуы себеп. Бұл мәселені шешу бағытында «Көкөзек» қосалқы стансасы салынғанымен, энергетикалық қуаттың жетіспеушілігі әлі де байқалуда. Осыған байланысты Елтай ауылдық округінің Жармұхамбет ауылында жаңа қосалқы станса салу жобасының құжаттамасы әзірленіп жатыр. Сондай-ақ «Қарасай ауданының Елтай ауылындағы электр желілерін қайта құру» жобасының сметалық құжаттамасы жасалуда. Мемлекеттік сараптаманың оң қорытындысы өткен жылдың 7 маусымында алынған болатын. Жобаның жалпы құны – 273,371 млн теңге. Бүгінде бұл жобаға қажетті қаржы бөлінді. Елтай ауылындағы электр желілерін қайта құру жөніндегі құрылыс-монтаж жұмысы биыл аяқталады.
– Тағы бір қиындық – аудан бойынша 2700-ден астам жеке трансформаторлық қосалқы станса (ТП) бар, алайда оларға талапқа сай қызмет көрсетілмейді, – деді Айдар Амантайұлы. – Мысалы, электр шаруашылықтарының жай-күйіне жауапты адамдар жоқ. Сондықтан апат болған жағдайда ақаудың орны мен себебін тез анықтау қиынға соғып отыр. Осы бағытта электр шаруашылықтарына жауапты мамандарды бекіту жұмысы жүргізілуде. Сондай-ақ ол аудан бойынша электрмен қамту сапасын арттыру үшін 44 трансформаторлық қосалқы станса ауыстырылғанын, оның ішінде 24 станса Қаскелең қаласында орналасқанын айта кетті. Электр желілерін жөндеу жұмысы жүргізіліп келеді. Ағаштарды санитарлық кесуге, сымдарды тартуға ерекше назар аударылады. Өткен жылы 155 ағаш бағанасы темір-бетон бағаналарына ауыстырылды, 436 ТП алдын ала жоспарлы жөндеуден өтті. Алдағы уақытта түрлі кернеудегі 135 шақырым желіні жөндеу бойынша да жұмыс жүргізілмек.
Энергетикалық тапшылықты шешу үшін Көлді ауылындағы электр стансасын модернизациялау бойынша жобалық сметалық құжаттама әзірленуде. Ал Исаев ауылында «Көкөзек-2» қосалқы стансасын салу үшін жер учаскесі рәсімделуде. Сондай-ақ 13 елдімекеннің электр желілерін модернизациялау бойынша жобалық сметалық құжаттама әзірленген. Оған Қаскелең қаласы, Шамалған, Жандосов, Қайнар, Долан, Жамбыл, Көлащы, Тұрар, Ұлан, Жібек жолы, Береке, Жармұхамбет, Көкөзек ауылдары кіреді. Облыстық комиссияға жалпы сомасы 4,6 млрд теңге болатын бюджеттік өтінімдер тапсырылды.
Қуат Қайранбаев
Қарасай ауданы
