Елтай ауылдық округіне қарасты Береке ауылында ерекше көңілді әрі танымдық «Өнегелі келін – өрісің» атты келіндер байқауы өтті. Аталған шараны Мәдениет үйінің қызметкерлері мен ауылдық округтегі аналар кеңесінің төрағасы, ардагер-ұстаз Салиха Сарықызы ұйымдастырды.
Ауылдық ардагерлер кеңесінің төрағасы Үркімбай Әзірбай мәдени шараға жиналған қауымға батасын беріп, жастарды тәрбиелеуге бағытталған осындай шараларды мүмкіндігінше көбірек ұйымдастыру қажеттігін айтты. Қазылар алқасының төрағасы, қадірменді ұстаз Гүлжан Инербайқызы, «Асыл ана» қоғамдық ұйымының төрайымы Күлпан Исабаева мен Іргелі ауылдық Мәдениет үйінің көркемдік жетекшісі Ақторқа Амантайқызы қатысушыларға сәттілік тіледі.
Байқауда бақ сынауға келгендер «Әдепті келін – ауылдың көркі», «Ананың алақаны әлемді тербейді», «Талаптыға нұр жауар», «Ата салтым – ардағым», «Бармағынан бал тамған» және «Қамыр жаю» сияқты номинациялар бойынша өз өнерлерін ортаға салды. Жас келіндер табиғи сұлулығын, жүрек тазалығын, қазақтың салт-дәстүрлері мен әдет-ғұрыптары туралы білімдерін, қабілеттерін көрсетіп, ұлттық тағамдарды дайындаудағы шеберліктерімен бөлісті.
– «Өнегелі келін – өрісің» конкурсы биыл бесінші рет ұйымдастырылып отыр. Жыл өткен сайын қатысушыларға қойылатын талаптар жоғарылап келеді. Бірақ соған қарамастан, үміткерлер барлық тапсырманы шебер орындап, өздерін тек жақсы жағынан көрсетіп келеді. Әрқайсысы мақтауға және мойындауға лайық. Сондықтан жеңімпазды анықтау қиындық туғызғаны рас, – деді қазылар алқасының төрағасы Гүлжан Инербайқызы.
Байқау қорытындысы бойынша ең үздік келін болып Қаратөбе ауылынан келген Назгүл Күзембаева танылды. Екінші орын Елтай ауылынан Нұрай Балтагүлге, үшінші орын Жармұхамбет ауылынан Айзада Шалғынбекке бұйырды. Сонымен қатар «Өнегелі келін» номинациясында Көкөзек ауылының келіні Гүлбақыт Балтабай, «Инабатты келін» номинациясында Исаев ауылынан Әсел Бексұлтан, ал көрермендер көзайымы сыйлығын Береке ауылынан Шынар Сағындықова жеңіп алды. Барлық қатысушы Алғыс хаттар және құнды сыйлықтармен марапатталды.
Қуат Қайранбаев
Қарасай ауданы