Ел Президенті Қасым-Жомарт Тоқаев 2025 жылды «Жұмысшы мамандықтар жылы» деп жариялағаны белгілі. Осыған орай «KazNetCom» компаниясы еңбек нарығында сұранысқа ие мамандықтар бойынша азаматтарды тегін оқытуды бастағалы отыр. Бұл бастама тұрғындар үшін өте тиімді шарттармен жүзеге асырылмақшы.
«KazNetCom» ЖШС директоры Жандос Әлімбетовтің айтуынша, оқу оптикалық-талшықты байланыс желілерін монтаждау шебері, сервис монтаждаушы, қауіпсіздік жүйелерін орнатушы сияқты мамандықтар бойынша жүргізіледі.
Оның айтуынша, бұл бағыттағы жұмыстар Қарасай, Іле және Талғар аудандарының кәсіби бағдар беру орталықтарымен бірлесе жүргізіледі. Себебі, бұл өңірлерде жұмыссыз азаматтар өзге аймақтарға қарағанда басымдау болып отыр. Оқыту аяқталғаннан кейін компания 300 мың теңгеден жоғары жалақымен жұмысқа орналастыруды және тамақпен қамтамасыз етуді кепілдендіреді.
Ең қызығы, өтініш берген адам үшін шешуші үш ай берілмекші. Осы уақыт ішінде ол мамандықты таңдап, өзіне қажетті саланы анықтап алуға міндетті. Өндірістік процесте теория мен практиканы ұштастыру көзделген. Осылайша, компания елімізде тапшы болып отырған жұмысшы мамандарын даярлауға өз үлесін қосуды жоспарланып отыр.
– Біз сұранысқа ие мамандық алғысы келетін және тұрақты жұмыс іздейтін барлық азаматты оқуға қабылдауға дайынбыз. Осылаша телекоммуникациялар саласын білікті мамандармен қамтамасыз ету мәселесін бірлесіп шешуге мүмкіндік аламыз, – деді Жандос Алтайұлы.
Игі бастама көптеген адамның жаңа мамандықты меңгеруіне, сол арқылы өзінің болашақ жолын қалауына жол ашпақ.
Қуат Қайранбаев,
Қарасай ауданы
