Дубайда ашық суда жүзуден өткен халықаралық жарыста Қонаев қаласының жас спортшысы, 7 жасар Дмитрий Кремпин күміс медаль жеңіп алды.
Аталған додаға 20 елден 4 пен 17 жас аралығындағы 100-ден астам бала мен жасөспірім қатысты. Жас спортшылардың қатарында жерлесіміз, кішкентай Дима да болды. Ол 500 метр қашықтықты бағындырып, жүлделі ІІ орынға табан тіреді.
Еліміздің намысын қорғаған Дмитрий 5 жасынан бастап жүзумен айналысып келеді. Жеңімпаз бала Қонаев қаласындағы «Айдария» бассейнінде жаттығады. Бапкері Мадияр Кемелжан биылғы жетістіктермен шектеліп қалмай, келесі жылы өз шәкірттерін ірі додаларға көбірек қатыстыруды жоспарлап отыр. Ал анасы Лариса Кремпина болса, ұлының дәл осы спорт түрін таңдағанына қуанышты.
Облыс орталығы Қонаев қаласында жүзу спортына арналған тек бір бассейн ғана бар. Оның қызметі ақылы. Мекеме көпбалалы отбасылар мен мүмкіндігі шектеулі адамдарға арнайы жеңілдіктер ұсынады. Қазіргі таңда мұнда 115 бала жаттығады.
Бейбіт МЕКЕЕВ