Қарасай ауданында қоғамдық көліктің қатары артуда. Жуырда «Алтын орда» базарынан Тұрар және Батан ауылдарына қатынайтын №6 мен №7 бағыттар ашылды. Жаңа автобустар тұрғындардың күнделікті қатынауына қолайлы.
Автобустар алғаш жолға шыққан күні облыстық жолаушылар көлігі және автомобиль жолдары басқармасының басшысы Ермек Баймұхамбетов пен Қарасай ауданының әкімі Жасұлан Естенов олардың жай-күйімен танысты. Заман талабына сай жабдықталған қоғамдық көліктердің қауіпсіздігіне, сапасына көз жеткізіп, жүргізушілермен тілдесті.
Ермек Беғазыұлының сөзіне сүйенсек, қоғамдық көліктер жұмысын жандандыру бағытындағы іс жалғасады және жолаушылардың жайлылығы үшін көлік инфрақұрылымын жақсартуға басымдық берілмек.
Жаңа ашылған бағыттарда электронды төлем жүйесі орнатылған. Сондай-ақ жолақысын ұялы байланыс операторы арқылы SMS-хабарламамен, арнайы көлік карталарымен және екінші деңгейлі банк карталарымен төлеуге болады.
Іске қосылған автобустардың саны – 12. Оның жетеуі №6 «Тұрар – «Алтын орда» базары» бағытында, бесеуі №7 «Батан – «Алтын орда» базары» бойынша жүреді. Қоғамдық көліктердің халыққа қызмет көрсету уақыты таңғы 6:00 шамасында басталып, кешкі 21:00-ге дейін жалғасады. Жүріс аралықтары 20 минутты қамтиды. Ал жолаушылар тасымалына әрі көлік қызметіне Алматы облысының жолаушыларды тасымалдау компаниясы жауапты.
Дидар МӘЛІКҰЛЫ
Қарасай ауданы
