Облыс әкімі Марат Сұлтанғазиев Нидерланды Корольдігінің делегациясымен, нақтырақ айтар болсақ, ауыл шаруашылығы, балық шаруашылығы, азық-түлік қауіпсіздігі және табиғат пайдалану министрлігінің өкілдерімен кездесті.
Сапарды министрліктің бас хатшысы, вице-министр Гуд Ян-Кейс бастап келді. Қазақстандықтар үшін Нидерландының егіншілік, суды тиімді пайдалану, агроөңдеу және кадрлар даярлау тәжірибесі аса маңызды болып саналады. Бұл салалар аграрлық секторды жаңғыртуда басты тірек бола алады.
– Алматы облысы – еліміздегі ауыл шаруашылығы саласы көшбасшыларының бірі. Мұнда үлкен егіс алқаптары шоғырланған, өндірістік және логистикалық инфрақұрылым дамыған. Аймақ астық, жеміс, ет, сүтке дейінгі Қазақстанның жалпы ауыл шаруашылығы өнімінің 8 пайызын қамтиды. Бұл межені сақтап қана қоймай, жаңа деңгейге шығу үшін экологиялық технологияларды қайта бағдарлау қажет. Бұл тұрғыда голландиялық тәжірибенің көмекке келері анық, – деді өз сөзінде аймақ басшысы.
Бүгінде Алматы облысында голландиялық капиталдың қатысуымен 9 компания, сондай-ақ 4 бірлескен кәсіпорын жұмыс істейді. Былтыр біздің аймақ пен Нидерланды арасындағы тауар айналымы 39 млн долларды құрады. Нидерландының жер көлемі шағын болғанымен, аграрлық сала бойынша әлемдік көшбасшылардың қатарына кіреді. Құпиясы – технологияға, ғылыми шешімдерге және тұрақтылыққа баса назар аударатындығында.
Голландиялық делегация өкілдері Қазақстанмен ынтымақтастықта, әсіресе білім беру, бірлескен жобаларды іске асыру және жергілікті аграрлық инфрақұрылымға инвестициялар тарту бағытында жұмыс істеуге ықыласты екендіктерін айтты.
– Біз үшін Қазақстан – стратегиялық серіктес. Біз мұнда тұрақты егіншілік, агроинновация бағытындағы ынтымақтастықтың зор әлеуетін көріп отырмыз және үздік тәжірибемен бөлісуге дайынбыз. Бұл кездесу жаңа жобалар мен байланыстарға жол ашады деп үміттенеміз, – деді Гуд Ян-Кейс.
Кездесуде тәжірибе алмасу мәселесі де сөз болды. Онда қазақстандық мамандардың Нидерландыда тағылымдамадан өту, голландиялық сарапшыларды тренингтер өткізу үшін Алматы облысына шақыру жайы қарастырылды.
Кездесу соңында жергілікті қайта өңдеуге және логистикаға инвестиция тарту мүмкіндігі қарастырылып, голландиялық ауыл шаруашылығы жобаларын жүзеге асыруда тұқым шаруашылығын дамытуға, өнімді экспорттауға баса назар аударылатыны айтылды.
Делегация ауыл шаруашылығы өнімдерін өндіретін «Ospanova Development», «lst Agro», «Frut Art» жауапкершілігі шектеулі серіктестіктеріне барып, аймақтың аграрлық саладағы мүмкіндіктеріне көз жеткізді. Ауыл шаруашылығын дамытуға климаттық жағдайдың қолайлы екендігіне баса мән берді.
Нидерланды Корольдігі делегациясының Алматы облысына сапары ауыл шаруашылығы саласындағы халықаралық байланыстарды нығайту мен шетелдік әріптестердің аймақпен ынтымақтастықты арттыруына берік негіз қалады.
Алма Есенбай