Қарасай ауданына қарасты «Үшқоңыр» спорт кешенінде ерлер мен әйелдер арасында жекпе-жек спортынан Қазақстан чемпионаты өтті. Жарысқа еліміздің әр аймағынан үздік шыққан 154 спортшы қатысты. Салтанатты ашылу рәсімінде облыстық дене шынықтыру және спорт басқармасы мен Жекпе-жек ұлттық спорт федерациясы өкілдері қатысушыларға сәттілік тіледі.
«Қазақстанда жекпе-жек өнері қарқын алып келеді. Бүгінгі ел чемпионаты соның бір дәлелі. Өскелең ұрпақ отаншылдық рухта тәрбиеленуі үшін ұлттық спортты жан-жақты насихаттауымыз керек. Қазіргі таңда жастардың жекпе-жек өнеріне деген қызығушылығы басым», – деді облыстық дене шынықтыру және спорт басқармасы басшысының орынбасары Рахман Шахарбек.
Жекпе-жек сегізбұрышта өтеді. Бұл спортта бастың артқы жағына, омыртқаға және тіземен соққы жасауға тыйым салынған. Ауырсынатын, тұншықтыратын әдістерге рұқсат етіледі.
«Әр халық өзінің ұлттық спортын дамытуға ұмтылады. Мәселен, Жапония – каратэ, дзюдо, джиу-джитсу, Корея – таэквондо, Ресей самбосымен танымал. Біз де ұлттық спортты дамытуға күш салуға тиіспіз. Қазақстанда жекпе-жек өнерін насихаттауда жүйелі жұмыстар қолға алынып келеді. Еліміз бойынша 12000-нан аса спортшы айналысуда. Алғашқы чемпионат 2017 жылы Атырауда өтті. Биылғы жарыс жеңімпаздары алдағы Азия чемпионатына қатысу үшін Грузияда оқу-жаттығудан өтеді, –¬ деді Жекпе-жек ұлттық спорт федерациясының вице-президенті Әзиз Әнетов.
Бас жаттықтырушы Нұрлан Аманкұловтың айтуынша, Қазақстандағы жекпе-жек федерациясы 2003 жылы құрылған. Алматы облысында 2012 жылдан бері жұмыс істеп келеді. Облыстық федерация құрамында 25-тен астам клуб, 3000 спортшы бар. Солардың ішінде республикалық және халықаралық жарыс жеңімпаздары аз емес.
Ерлер арасындағы сайыс 9 салмақ дәрежесінде, ал әйелдер бәсекесі 5 салмақ бойынша өтті. Жарыста 14 медаль жиынтығы сарапқа салынды. Спортшылардың жылдамдығы мен ептілігі, әдіс-тәсілдері жанкүйерлердің делебесін қоздырды. Олар жеңіске жету үшін барын салды. Әсіресе, әйелдер арасындағы жекпе-жекте Инас Әшірбек пен Адель Махаметованың финалдағы кездесуін төрешілер жоғары бағалады.
«Мен бес жасымнан қазақ күресімен айналыстым. Осы уақытқа дейін көптеген жарысқа қатысып, жүлдегер атандым. Арманым – ¬ әлем чемпионы болу. Әрине, ол үшін көп тер төгіп, бапкердің айтқан тапсырмасын бұлжытпай орындауың керек. Сонда ғана жеңіс тұғырынан көрінесің,» – дейді жекпе-жектен Қазақстан чемпионатының жеңімпазы Адель Махаметова.
Ерлер арасында Алматы облысынан қатысқан Нұрсұлтан Оспан мен Рахат Маратханұлы жүлдегер атанды. Аталған жарыста Алматы облысының спортшылары Шымкент қаласы, Түркістан мен Жетісу облысынан кейінгі үздік төрттіктен көрінді.
