Жамбыл аудандық Мәдениет үйінде көрнекті жазушы, ҚР еңбек сіңірген қайраткері, «Алаш» әдеби сыйлығының иегері, Алматы облысының Құрметті азаматы Нағашыбек Қапалбекұлының 75 жасқа толуы аталып өтті. Қарымды қаламгердің туған жерінде өткен шараға елге белгілі зиялы қауым өкілдері, жазушылар, өңір жұртшылығы қатысты.
Салтанатты жиында облыстық мәдениет, архивтер және құжаттама басқармасының басшысы Данияр Әлиев сөз алып, облыс әкімі Марат Сұлтанғазиевтің мерейтой иесіне деген арнайы тілегін жеткізді. Құттықтау хатта Нағашыбек Қапалбекұлының ұлт руханиятына қосқан еңбегіне ризашылық білдірілген. «Саналы ғұмырыңызды отандық журналистика мен әдебиеттің өркендеуіне арнадыңыз. Қоғам қайраткері, жазушы, зерттеуші ретінде атқарған көп қырлы қызметіңіз болашақ ұрпаққа өнеге, ал бүгінгі қоғам үшін үлкен мақтаныш. Ел тарихын тереңнен зерделеп, тұлғалар тағдырын шебер бейнелеп, ұрпақ санасына ұлттың рухын сіңіріп келесіз. Бұл – нағыз қаламгерге тән миссия. Өмір жолыңыз – елімізге деген адалдықтың айқын үлгісі. Ұлт тарихы мен тұлғаларын насихаттауда, әсіресе Жамбыл Жабаев пен оның ақындық мектебі жайлы зерттеулеріңіз – ұлттық мұрамызды жаңғыртудың жарқын көрінісі. Еңбектеріңіз – халқымыздың тарихи жадын сақтауға қосқан зор үлес. Сізге зор денсаулық, отбасыңызға амандық, шалқар шабыт, толағай табыс тілеймін!» – делінген облыс басшысының құттықтауында.
Аудан әкімі Нұрлан Ертас жерлес жазушыға деген ізгі тілегін білдірді. Кеш иесінің иығына қазақы дәстүрмен шапан жабылып, зор құрмет көрсетілді. Әдеби-сазды кештің тізгінін Жамбыл атындағы мемлекеттік филармонияның бас директоры Ақан Әбдуәлі қолға алып, салиқалы сөзімен тұздықтай отырып, шебер жүргізді. Еңбек жолын ауданда бастаған жазушының өмір жолы кеңінен баяндалды. Мінбеде сөз алған аузы дуалы әдебиет майталмандары мен ғалымдар жазушы шығармашылығының ерекшелігіне, көркем туындыларында өмір шындығының шынайы суреттелуіне тоқталды. Жеке басындағы жақсы қасиеттер де сөз болып, шығармашылық адамына керекті қасиеттердің барлығы Нағашыбек Қапалбекұлында бар екені айтылды.
Бұл орайда Қазақстан Жазушылар одағы басқармасы төрағасының орынбасары Қасымхан Бегманов, ҰҒА академигі, филология ғылымдарының докторы, профессор Қансейіт Әбдезұлы жазушы шығармаларының көркемдік деңгейін сөз етсе, «Қазақ әдебиеті» газетінің бас редакторы, ақын Бауыржан Жақып мерейтой иесіне арнаған «Елге сыйлы елгезек» атты өлеңін оқыды. Кеш барысында қазақтың қабырғалы қаламгері Нұрлан Оразалиннің жолдаған тілегі, басқа да белгілі мемлекет және қоғам қайраткерлерінен, шетел жазушыларынан келіп түскен ізгі лебізге толы жеделхаттар оқылды. Әл-Фараби атындағы Қазақ ұлттық университетінің ректоры Жансейіт Түймебаевтың құттықтау хаты табысталды. Қонаев атындағы заң университетінің ректоры Өмірәлі Жалайыри, облыстың Құрметті азаматы Әскербек Абаев ізгі тілектерін білдірді. Сахна төрінде жазушының баспадан жаңа шыққан «Сакура гүлдегенде» кітабының тұсауы кесіліп, оқырмандарға жол тартты. Сөз өнерін жанына серік еткен аудан жастары жазушы шығармаларынан үзінді оқыды. Елге белгілі дәстүрлі әншілер мен эстрада жұлдыздары, аудандық «Сүйінбай сазы» ансамблінің өнерпаздары әуелете ән салды.
Саналы ғұмырын ұлттық руханиятқа арнап, өндірте жазып келе жатқан Нағашыбек Қапалбекұлы өз шығармалары арқылы республика оқырмандарына кеңінен танымал. Шығармалары бірнеше шет тіліне аударылған. Ол Жамбыл мен Сүйінбай мұрасын насихаттауға, әдебиет әлемінде өшпес із қалдыруға сүбелі үлес қосып жүрген бірегей жазушы. Әр жылдары көптеген прозалық кітабы жарық көрген. 2021 жылы Жамбыл мұрасы жайлы 40 томдық жинақ шығарса, өткен жылы Сүйінбай ақынның 10 томдық толық шығармалар жинағын құрастырды. Жалпы саны 50-ден астам кітаптың авторы.
Серік САТЫБАЛДИЕВ
Жамбыл ауданы
