Қонаев қалалық Мәдениет үйінде Қазақстан халқы Ассамблеясының 30 жылдығы мен «Меруерт» балалар өнер мектебіне 25 жыл толуына орай мультшоу-музыкалық перформансы өтті. Мәдени шара қонақтардың «Art studio creative» бейнелеу студиясындағы өнерлі өрендердің мультфильмдер желісі бойынша салған туындылары қойылған көрмені тамашалаудан басталды.
«Art studio creative» студиясының негізін қалаушы Таисия Теперикова жас суретшілердің жетістігіне тәнті екенін айтып, олардың шығармашылығы алда талай биіктерді бағындыратынына сенім білдірді.
Салтанатты шарада өнер мектебін мерейтойымен құттықтаған облыстық ішкі саясат басқармасы басшысының орынбасары, Қазақстан халқы Ассамблеясы хатшылығының меңгерушісі Әсел Жалғасбаева, облыстық мәслихат депутаты Сергей Горяной, Қазақстанның орыс, славян және казак ұйымдары қауымдастығы облыстық филиалының басшысы Лариса Котельникова шәкірттер жетістігіне себепкер болып жүрген ұстаздарға марапат табыстады.
«Меруерт» балалар өнер мектебінің директоры Оксана Белкова 25 жылда өнер ошағы жүздеген талантты баланың екінші үйіне айналғанын, сондықтан мерейтойды шығармашылық концертпен атап өтуге шешім қабылдағанын жеткізді. Осы жылдардың жетістіктерге толы болғанын, оқушылардың байқауларда жүлдегер атанып жүргенін мақтанышпен тілге тиек етті.
Сахнада мектептің шәкірттері, түлектері, ұстаздары мен қалалық этномәдени бірлестіктердің өкілдері өнерлерін ортаға салды. Бағдарламада қазақ, орыс, ағылшын және француз тіліндегі әйгілі мультфильмдерден сүйікті әуендер орындалды. Кішкентай әртістердің талантына көрермен тәнті болды.
Айжарық КӨПТІЛЕУОВ
Қонаев қаласы
