Облыс әкімінің орынбасары Ғани Майлыбаев жұмыс сапарымен Райымбек ауданында болып, қоғам белсенділерімен кездесті. Жиында өңірде атқарылып жатқан іс-шаралар, шешімін күткен өзекті мәселелер талқыланды. Шараға Райымбек ауданы әкімінің орынбасары Жанарбек Жақсылық, аудандық мәслихат хатшысы Самат Мүсірбаев, аудандық қоғамдық кеңес төрағалары, аудандық мәслихат депутаттары, ауыл әкімдері, мекеме, ұйым өкілдері қатысты.
Кездесуде Ғани Айдарұлы қоғамдық ұйымдар мен атқарушы билік арасындағы байланыстың ел дамуындағы маңызын атап өтті. Мемлекет басшысы Қасым-Жомарт Тоқаевтың жуырда ғана жарияланған «ҚР Ішкі саясатының негізгі қағидаттары, құндылықтары мен бағыттарын бекіту туралы» Жарлығында көрсетілген мақсат-міндеттерге қысқаша тоқталды. Ішкі саясаттың мақсаты – ел бірлігін нығайту, қоғамдық-саяси ахуалдың тұрақтылығын қамтамасыз ету. Ең басты идея – баршаға бірдей мүмкіндік беретін өркениетті қоғам – Әділетті Қазақстанды құру.
Қоғамдағы тұтастық пен татулықтың, ұлттық құндылықтардың бүгінге дейін қаз-қалпында сақталуы – көпті көрген көнекөз қариялардың ақыл-кеңесі мен парасатты пайымының жемісі. Ел ішінде ізгілік пен ынтымақты нығайту жолында ақ жаулықты аналар мен ел ағалары, сондай-ақ қоғамдық кеңестер институты белсенді атсалысып, бірлік пен берекенің сақталуына үлес қосып келеді. Облыс әкімінің орынбасары осынау ортақ мүдде жолында аянбай еңбек етіп жүрген қазыналы қарияларға деген құрмет ешқашан төмендемейтінін айта келіп, оларға ыстық ықылас, шынайы алғыс сезімін білдірді.
Келесі кезекте сөз тізгінін Райымбек аудандық ақсақалдар алқасының төрағасы Медетқан Абиыров ұстады.
– Біздің аудан облыс орталығынан 390 шақырым қашықтықта орналасқан. Бұл қазақ жерінің ең биік нүктесі, талант пен тектіліктің символына айналған, қазақ поэзиясының Хантәңірі атанған өңір екені белгілі. Халқымыздың кемелденуі мен ұрпақ болашағының жарқын болуы жолында аянбай еңбек еткен мемлекет және қоғам қайраткерлері, қазақ әдебиетінің көрнекті өкілдері, қарымды қаламгерлер, ел экономикасының дамуына маңдай терін сіңірген еңбек ерлері – бәрі де осы өңірден шыққан бірегей тұлғалар, туған жердің мақтаныштары. Елдің береке-бірлігінің нығаюына негіз қалаған да – осындай дара перзенттердің өнегелі жолы мен қайраткерлік еңбегі. Шалғайда жатса да шырағы жарық, экономикасы өркендеген, мәдениеті жоғары, әл-ауқатының жақсара түсуі – сол асыл азаматтардың салып кеткен сара жолының, солардың өнегесін жалғастырушы ұрпақтың ұлағатты істерінің нәтижесі. Бұл тұрғыдан алғанда, таулы өлкені ештеңеден құралақан қалды деуге негіз жоқ. Дегенмен бүгінгі уақыт талаптарымен салыстырғанда, ел тұрмысын жақсартуда әлі де шешімін күткен мәселелер аз емес, – деді ол.
Ауданның көрші ауданға екі-үш мәрте қосылып, кейін қайта бөлінуі өңірдің экономикалық тұрғыдан кері кетуіне әсер етті. Соның салдарынан ауылдық жерлердің мәдениеті мен тазалығы төмендеп, жастар тәрбиесіне қатысты жұмыстар босаңси түсті. Жұмыс орындарының азаюы да тұрғындардың жан бағу қамымен басқа өңірлерге көшуіне себеп болғаны белгілі. Аудан қайта келіп, экономикасы мен әлеуеті, мәдениеті жақсарғанымен, көші-қон әлі тоқтаған жоқ. Егер кереғар құбылыс осылай жалғаса беретін болса, болашақта бұл өңірде ешкім қалмауы мүмкін. Осындай әлеуметтік саланың қиындығы басым болып тұрған жерде қоғамның қозғаушы күші саналатын жастар мәселесі де күрделене беретіні анық. Сондықтан елдің шеті, желдің өтінде, көрші мемлекетпен шектесіп жатқан ауданға шекаралық аймақ мәртебесі берілуі қажет. Бұл мәселе кезек күттірмеуі тиіс. Аталған жайт жүйесін табар болса, еңбекақы төлемдеріне үстеме қосылуына, өнеркәсіп орындарының ашылуына, сол арқылы күнкөрістің жақсаруына жол ашылатыны сөзсіз. Айтылғанына 6-7 жыл болған елдімекендерді газдандыру да сөз күйінде қалып келеді. Аудандық ақсақалдар алқасының төрағасы Ғани Майлыбаевқа осы мәселелерді тиісті орындарға жеткізіп, оның жүзеге асуына көмектесуін өтінді.
Өз кезегінде сөз алған аудандық қоғамдық кеңестің төрағасы Айыпжан Қаптағаев та көші-қон мәселесіне айрықша тоқталды. Мектептерде бұрын әр оқу жылын 100-ден аса түлек бітіріп шығатын болса, қазір бұл көрсеткіш 10-15-тен аспайтын дәрежеге жеткен. Мектептердің материалдық-техникалық базасы да көңіл көншітпейді. Күрделі жөндеуге бөлінген қаражатты ұтып алған компаниялар міндетті жұмыстарын өз мәнінде атқармай отырғанын, нәтижесінде Көмірші, Көксай орта мектептерінің жөндеу жұмыстары аяқсыз қалғанын, К.Байшығанұлы атындағы орта мектепке күрделі жөндеу қажет екенін Ғани Айдарұлының есіне салды.
Келесі кезекте мінбеге көтерілген «AMANAT» партиясы Райымбек аудандық филиалының төрағасы Гүлнар Әріпова, аналар кеңесінің төрағасы Балжан Омарова, ауданның ардақты ақсақалы Нұрлан Әкімбайұлы жер-су аттарын өзгертіп, тарихи атауларын қайтару, тарихи-өлкетану музейін ашу, аналар кеңесіндегі атқарылып жатқан жұмыстардың өміршеңдігі, шаруалардың қолдарындағы ауыл шаруашылығы өнімдерін қабылдайтын арнайы өнеркәсіп орындарын құру, тазалық пен мәдениетті көтеруге бағытталған шараларды жандандыру керектігін алға тартты.
Қоғам белсенділерімен өткен кездесуде көтерілген мәселелердің орынды екенін атап өткен Ғани Майлыбаев олардың барлығы тиісті орындарға жеткізілетінін айтты. Әлеуметтік сала бағытында ұсыныс-пікір білдірген қоғамдық ұйым жетекшілеріне, ақсақалдар қауымына және жиынға белсене қатысқан тұрғындарға ризашылығын білдірді.
Жұмабек ТҰРДИЕВ
Райымбек ауданы