Кеген аудандық Мәдениет үйінде ұлт руханиятының айтулы тұлғасы, ақын, жыршы, сазгер Бөлтірік Атыханұлының туғанына 155 жыл толуына орай оқушылар арасында «Атадан қалған асыл сөз» атты облыстық жыршы-термешілер байқауы өтті.
Аталған жыр жарысын облыстық халық шығармашылығы орталығы мен Кеген аудандық Бөлтірік Атыханұлы атындағы айтыс, жыр-терме орталығы бірлесе ұйымдастырды. Шараға кино және театр актері, Қазақстанның еңбек сіңірген қайраткері Омар Қиқым, жыр-терме орталықтарының тәлімгерлері, өнерлі шәкірттердің ата-аналары қатысты.
Мақсаты – облысқа қарасты жыр-терме орталықтарында тәлім алып жатқан оқушыларға жан-жақты жыршылық, термешілік бағытында тереңдетілген білім беруді жетілдіре отырып, өнерге деген қабілетін шыңдап, тұлғалық болмысының қалыптасуына ықпал ету.
Байқауға Мәдениет саласының үздігі, Құрманғазы атындағы Қазақ ұлттық консерваториясының аға оқытушысы, өнер зерттеушісі Тілеулес Құрманғалиев, облыстық халық шығармашылық орталығы жыр-терме бөлімінің маманы, жыршы-термеші Серік Сүйіндік, Кеген аудандық Мәдениет үйінің көркемдік жетекшісі Кәдірбек Сүлеймен қазылық жасап, оқушылар өнерін сарапқа салды.
– Бөлтірік Атыханұлы – өз дәуірінде ел бірлігі мен ынтымағын ту еткен тұлға. Оның даналық сөздері мен тағылымы, терең ойлары ғасырлар өтсе де, өзектілігін жоймай, ұрпақтан-ұрпаққа мұра болып келеді. Бұл байқау – халқымыздың тарихын, өмір салтын, рухани байлығын бейнелейтін өнер додасы. Сол өнерді ұлықтау – баршамыздың ортақ парызымыз, – деген Тілеулес Құрманғалиев үміткерлерге сәттілік тіледі. Ақынның ұрпағы Бақытгүл Бөлтірікқызы жас дарындарға батасын берді.
– Байқау барысында 11 өнерпаз Бөлтірік атамыз бен өзге де өңір шайырларының шығармаларын орындады. Жастайынан қаланған берік іргетас өскен сайын кемелдене береді. Жыр додасынан оқушылардың алғаны көп болды деген ниеттемін. Сондай-ақ осы өнер жарысын ұйымдастыруға ұйытқы болған азаматтар – Серік Айтбайұлы, Еркебұлан Нұрбайұлы, Нұрым Байбала, Расул Сауытбектерге әулет атынан айтар алғысымыз шексіз, – деді Бақытгүл Бөлтірікқызы.
Қазылар алқасы жас жыршы-термешілерге мақамды салу мәнері, сахна мәдениеті мен шығарманы жатқа орындауы бойынша өз бағасын берді. Нәтижесінде Қарасай ауданынан келген Оралхан Іңкәр (тәлімгері – Ақбота Манарбекқызы) бас жүлде иегері атанды. Талғарлық Айтбай Ақжарқын (тәлімгері – Сүйіндік Серік) І орынды жеңіп алды. ІІ орынға Жамбыл ауданынан қатысқан Жамбыл Омарбекұлы (тәлімгері – Жылбек Тоқтасынов) мен кегендік Арғынбек Жанасыл (тәлімгері – Байбала Нұрым) лайық деп танылды. Талғар ауданынан келген Қорған Айдосұлы (тәлімгері – Рахымбай Ермек) ІІІ орын иегері атанды. Райымбек ауданынан Айару Дарханқызы (тәлімгері – Құрметжан Ербақ) «Бөлтірік Атыханұлы» атындағы арнайы жүлдені еншілесе, Рахымбек Серік (тәлімгері – Мұхамжан Берікбол) «Көдек Байшығанұлы» атындағы арнайы жүлдені иеленді. Дода жеңімпаздары мен тәлімгерлеріне қаржылай сыйлық пен арнайы грамоталар табысталса, басқа да қатысушылар Алғыс хаттарға ие болды.
Осылайша, шешендік өнердің шебері Бөлтірік Атыханұлының 155 жылдық мерейтойына арналған облыстық байқау өз мәресіне жетті.
Дәурен ӘБУТӘЛІПОВ
Кеген ауданы
