Қарасай ауданының Алмалыбақ ауылындағы жаңадан пайдалануға берілген жайлы мектепте «Ғылым мен өнердің шырақтары – Шоқан мен Абай» атты тақырыпта кең бағдарламалы әдеби-сазды кеш болып өтті. Бұл жаңадан ашылып отырған жайлы мектептің алғашқы, былайша айтқанда, беташар іс-шарасы. Аталған іс-шараға өңірдегі мектептерден ұстаздар мен оқушылар, ауыл тұрғындары, ардагерлер қатысты.
Салтанатты сәттің ашылуында осы іс-шараға мұрындық болған, Ұмтыл ауылдық ардагерлер ұйымының төрағасы, биология ғылымдарының докторы, профессор, академик Әйіп Ысқақов кіріспе сөз сөйлеп, жаңадан ашылып отырған мектептің ұстаздары мен оқушыларына сәттілік пен мол жақсылық тіледі. Шоқан Уәлиханов пен Абай жайлы әдемі де әсерлі әңгімесімен бөлісті. Сонымен бірге мектептің жаңадан ашылып отырған кітапханасына өзінің жаңадан баспадан шыққан, белгілі ғалым Ізтілеу Әбуғалиев жайлы кітабы мен ауылдан шыққан талантты ақын Сыман Қылышбаевтың жыр жинақтарын табыстады. Бұдан кейін сөз алған «Ыбырай Алтынсарин» төсбелгісінің иегері, тәжірибелі ұстаз, осы ауылдағы «Болашақ» мектебінің директоры Нағима Сағатқызы, мектептің қоғамдастық мүшесі Әсия Әбдіраманова, Қарасай аудандық ардагерлер ұйымы төрағасының орынбасары Серік Бертайұлы, 90 жастағы ауыл тұрғыны, академик Елтай Хасенов, аталған жайлы мектептің директоры Жанар Әбдірахмановалар сөз сөйлеп, аталған білім ордасының айтарлықтай табыстарға қол жеткізуіне тілектестік білдірді.
Қос алыпқа арналған кеш өз мәнінде басталды. Мектеп оқушылары Абай ата өлеңдерінен және қара сөздерінен дайындаған әдеби-музыкалық шығармаларын талапқа сай шеберлікпен орындап шықты. Сонымен қатар мектеп оқушылары Абайдың қара сөздеріне байланысты өмірлік көріністерді және Шоқан өміріне қатысты оқиғаларды сахна төрінде айшықты түрде бейнелеп берді. Мектептің шығармашылық ұжымы Шоқан мен Абайдың өмір жолынан мәнді де мазмұнды кезеңдерді керемет етіп көрермен қауымның алдына ұсынды. Осы орайда сахна төрінен көрермен қауымның ризашылығына бөленген мектеп оқушысы Шынар Ерланқызының, музыка пәнінің мұғалімі Мейіргүл Нұрсұлтанның, Шоқан мен Абайға арнау өлеңін оқыған ұстаз Ардақ Қалиеваның, қазақ тілі мен әдебиеті пәнінің мұғалімі Салтанат Нарымбетованың, Шоқан мен Абайға арнау өлеңін оқыған Рәзия Ризабекқызының өлеңіне көрермен қауым қошеметпен қол соғып отырды. Сол сияқты мұнда Алмалыбақ ауылындағы Егіншілік және өсімдік шаруашылығы ғылыми-зерттеу институтының «Парасат» хорының көрсеткен өлшеусіз өнерлеріне халық ерекше ыстық ықыласпен дән риза болды. Сөйтіп, Алмалыбақ ауылындағы жайлы мектептің алғашқы тақырыптағы игілікті іс-шарасына жиналған қауым риза болып, ақ ниетпен тарасты.
Қанат ТӘКЕБАЕВ
Қарасай ауданы
