Ұлыстың ұлы күні – Наурыз мерекесін «Сәуле Сапар» оңалту орталығының жеткіншектері мерекелік көңіл-күймен қарсы алды. Бұл орталықта 115 бала әртүрлі диагноздармен емделуде. Өз ата-аналары мен орталық қызметкерлерінің қолдауымен олар әдемі концерттік бағдарламалар мен мерекелік дастарқан дайындады.
Мерекелік шара фанфарлардың үнімен ашылды. Шараның басталуын орталықтың педагогы, АВА-терапевт Нұрай Сәбит жариялады. Емделуші Ясмин Сатаеваның әжесі мен орталық директоры Казбек Халлман барлық қатысушыларды Наурыз мерекесімен құттықтады.
Осыдан кейін ұсынылған концерттік бағдарлама көпшілік көңілінен шыққаны анық. Балалар тобы өздерінің қымбатты аналарына арналған «Ана» атты әсем әнді орындады. Солардың қатарында Ясмин Сатаева да бірнеше ән орындап, көпшілікті өнерімен тәнті етті. Балалар тобы «Бозжорға» биімен, қыздар тобы «Текемет» биімен көрермендерді қуантты. Кішкентай Нұрсұлтанның анасы Назира да әдемі әрі көңілді ән айтып берді. Сонымен қатар балалар түрлі ойындар ойнап, ата-аналар арасында армрестлинг пен арқан тартудан жарыстар өтті. Жеңімпаздар түрлі сыйлықтармен марапатталды.
Мерекенің тағы бір ерекшелігі – «Тұсаукесер» дәстүрі десе болады. Бұл рәсімге ДЦП диагнозына қарамастан, оңалту курсынан өтіп, алғашқы қадамдарын жасаған Бақыт Сұлтан қатысты. Мереке дастарқан басында жалғасын тапты.
Орталықтың тәрбиеленушілері үшін мұндай мерекелер жеткен жетістіктерін көрсету мүмкіндігін берді. Бұрындары әлсіз, дәрменсіз болған кішкентай ханзадалар мен ханшайымдар қазір ән салып, би билеп, өлең оқып, ойын ойнап, осындай мерекелерді бірге өткізіп, үлкен бір отбасыға айналды.
Қуат Қайранбаев
Қарасай ауданы
