Балқаш ауданының орталығы Бақанас ауылында “Таза Қазақстан” республикалық экологиялық акциясы аясында Бақанас магистральды каналының маңы қоқыстан тазартылды. Акция аудандағы санитарлық тазарту, қоршаған ортаны, табиғатты аялау, ағаш отырғызу арқылы көркейту және көгалдандыру жұмыстарын сапалы түрде жүзеге асыруды көздейді. Осыған орай әр аптаның сәрсенбі және сенбі күндері сенбілік күні ретінде белгіленген болатын.
Аталған сенбілікке “Тазалық табалдырығыңнан басталады” деген тәмсілді ұран еткен ауыл тұрғындары, мекеме-ұйым қызметкерлері белсене қатысты. Атап айтсақ, олардың қатарында Балқаш аудандық Жастар ресурстық орталығы, аудандық білім бөлімі, М. Сеңгірбаев атындағы орта мектеп, аудандық Мансап орталығы, аудан әкімдігі және Бақанас ауылдық округінің әкімшілігі қызметкерлері бар. Барлығы 53 мекемеден тазарту жұмыстарын жүргізуге қатысқан 120-ға жуық экобелсендінің пікірінше, Отанға деген құрмет ең әуелі туған жер табиғатын аялаудан басталады.
Балқаш ауданы әкімінің орынбасары Данияр Нұрмановпен тазалық акциясы жөнінде тілдескен едік. Ол: “Тазалық айлығы басталғалы бері аудан бойынша 9 сенбілік ұйымдастырылды. Оның нәтижесінде бүгінгі күнге дейін 89 көше, 1413 тұрғын үй мен мекеме-ұйым аулалары, онымен қоса бірқатар арық жүйелері және саябақ аумақтары тазартылды. Тұрғын үйлерге әктеу жұмыстары жүргізіліп, олардың шарбақтары мен қоршаулары да сырланды” дей келе, сондай-ақ тазалық айлығы аясында он бір мыңға жуық ағаш көшеттерін отырғызу жоспарланғанын да атап өтті.
Айта кететін жайт, Бақанас ауылдық округі әкімшілігінің бас маманы Гүлдана Ерланбекқызы мен аталған мекеменің операторы Индира Нұраханқызы тазарту жұмыстарының басы-қасында жүріп, “Таза Қазақстан” акциясы аясындағы ауқымды жұмыстардың сапалы жүргізілуін арнайы қадағалады.
Қорыта келгенде аудан көлеміндегі көгалдандыру, абаттандыру, санитарлық тазарту жұмыстарының қарқыны жоғары. Сонымен қоса өңірде заңсыз күл-қоқыс тастаудың алдын алу мақсатында тұрақты түрде рейдтік іс-шаралар да ұйымдастырылып тұрады.
Ағаш отырғызу, тазалық жұмыстарын жүргізу, қоршаған ортаны жасыл желекке айналдыру, экологияға үлес қосу арқылы ауа ластануының алдын алуды балқаштық тұрғындар өз парызына балайды. Табиғатты аялайық!
Алтынай СЕЙТКЕН
Балқаш ауданы
