Алматы облысында өңірдің спорттық инфрақұрылымын дамытуда айтулы оқиға өтті. Алатау қаласында А. Асанов атындағы атыс клубының базасында жаңа дене шынықтыру-сауықтыру кешені ашылды. Кешен құрамына көрермендерге арналған трибуналары бар көпфункционалды спорт залы, бассейн, семсерлесу залы, жаттығу залы және жабық пневматикалық тир кіреді. Спорт нысаны мемлекеттік-жекешелік әріптестік аясында жүзеге асырылды. Оның жалпы ауданы – 4,8 мың шаршы метр. Жобаның жалпы құны – 2,5 млрд теңге.
Жаңа спорт орталығы ең алдымен балалар мен жасөспірімдер спортын дамытуға бағытталған. Мұнда баскетбол, стритбол, гандбол, үстел теннисі, стендтік және оқ ату, жүзу, велоспорт, семсерлесу және садақ ату секциялары жұмыс істейді. Кешеннің өткізу қабілеті аптасына кемінде 800 баланы қамтуға мүмкіндік береді. Бұл әсіресе, ауыл жастары үшін сапалы спорттық дайындыққа қолжетімділікті айтарлықтай арттырады.
«Осындай заманауи спорт нысандарын салу – ұлт денсаулығына және қазақстандық спорттың болашақ жетістіктеріне инвестиция салумен тең. Мұнда бұқаралық спорт резервін де, ел намысын халықаралық аренада қорғайтын жоғары деңгейдегі спортшыларды да даярлаудың берік негізі қаланады» – деді ашылу салтанатында Қазақстан Республикасының туризм және спорт министрі Ербол Мырзабосынов.
Алматы облысының әкімі Марат Султангазиев бұл жобаның тек инфрақұрылымдық нысан ғана емес, дені сау, қайратты әрі мақсатшыл ұрпақ тәрбиелеуге бағытталған маңызды әлеуметтік бастама екенін атап өтті.
Жобаны іске асыру нәтижесінде 73 жаңа жұмыс орны құрылып, А. Асанов атындағы атыс клубының материалдық-техникалық базасы едәуір нығайтылды. Алдағы уақытта кешен өңірлік және республикалық жарыстарды, оқу-жаттығу жиындарын өткізуге және заманауи спорттық дайындық әдістерін енгізуге арналған маңызды алаңға айналады.
