Еңбекшіқазақ ауданында “Таза Қазақстан” экологиялық бағдарламасы аясында облыс әкімі Марат Сұлтанғазиевтің тапсырмасымен қала, ауыл ішімен қатар, табиғат аясындағы демалыс орындарына да тазалық жұмыстары жүргізілді.
Ауқымды экологиялық іс-шараға аудандағы мекемелердің қызметкерлері, аудан тұрғындары мен жастар, еріктілер – жалпы саны үш жарым мың адам атсалысты. Сондай-ақ 53 арнайы техника жұмылдырылды.
“Жер жүзін жадыратқан шуақты көктеммен бірге ауылдарда тазалық жұмыстарын жүргізіп, айналамызға көрік кіргізіп қойғанымыз қандай жақсы. Көшелер, қоғамдық орындар күл-қоқыстан тазарды. Арықтар мен өзендердің арнасы, жағалауы жиналды. Жол бойына жас талдар отырғызылды. Сондай-ақ ауданымыздың мақтанышы – Есік көлінің де айналасы тазартылып, абаттандыру жұмыстары жүргізілді. Табиғатты аялау, қоршаған ортаға қамқор болу және осы әдеттерді жастардың бойына сіңіру – біздің бір борышымыз” – дейді ақсақалдар кеңесінің мүшесі Совет Смадылов.
Сенбілікте аудан аумағында жалпы саны 1052 түп ағаш отырғызылып, аудан аумағынан 43 тонна қоқыс шығарылды.
Қоршаған ортаны қорғау, елді мекендердің тазалығын сақтау және тұрғындар арасында экологиялық мәдениетті қалыптастыру мақсатында ұйымдастырылған “Таза Қазақстан” экологиялық бағдарламасы алдағы уақытта да жалғасын таппақ.
Құралай МҰРАТҚЫЗЫ
Еңбекшіқазақ ауданы
