Талайдан бері тұрғын үй кезегін күтіп жүрген қарасайлықтар қуанышқа кенелді. Оларға аудан әкімдігінде құрмет көрсетіліп, Отан қорғаушылар күні мен Жеңіс мерекесіне баспана кілті табысталды.
Қарасай ауданының әкімдігінде өткен қуанышты шарада өңір басшысы Жасұлан Естенов жаңа қоныс иелеріне ақ тілегін арнады.
– Мемлекет тарапынан халыққа әлеуметтік көмек көрсетіліп жатқаны белгілі. Соның бір дәлелі – бүгін өз деріңізге баспана кілттерінің табысталып жатқаны. Былтыр дәл осылай 200-ден астам пәтер иелері қуанышқа кенелген болатын. Алдағы уақытта тағы біраз отбасына баспана кілтін беру жоспарлануда. Оның бәрі, әрине, тұрғын үй кезегі бойынша жүзеге асатын болады. Бүгінгі қуаныш иелерін шын жүректен құттықтаймын! Шаңырақтарыңыз шаттыққа толы болсын, – деді аудан басшысы.
Осындай ізгі ниеттен соң, халықтың әлеуметтік осал топтары санатындағы 28 отбасына пәтер кілттерін табыс етті. Ал баспаналы болған қарасайлықтар қуаныштарымен бөлісіп, мемлекеттің көмегіне және аудан әкімдігінің көрсетіп жатқан қолдауына алғыстарын жеткізді.
Айта кетер болсақ, баспана кілттері Қаскелең қаласы мен Елтай ауылдық округтерінде салынған жаңа тұрғын үй кешендерінен және Шамалған ауылындағы жекеменшік үйден берілді. Қарасай аудандық тұрғын үй-коммуналдық шаруашылығы және тұрғын үй инспекциясы бөлімінің мәліметінше, дәл осындай халықтың әлеуметтік осал топтары санаты бойынша тұрғын үй кезегінде тұрған қарасайлықтар үшін жақын арада тағы 100-ден астам пәтер кілтін беру жоспарлануда.
Дидар МӘЛІКҰЛЫ
Қарасай ауданы
