Ұлы Жеңіс – халқымыздың тарихындағы ең қастерлі күндердің бірі. Бұл – келешек ұрпақтың бейбіт өмірі үшін жанын қиған боздақтарды еске алып, ел қорғаған батыр бабаларға тағзым ететін күн.
Осыған орай мереке қарсаңында Балқаш ауданының әкімі Азат Құтпанбетов өңірдегі тыл еңбеккерлерінің үйіне арнайы барып, ардагерлерге құрмет көрсетті. Аудан басшысымен Балқаш аудандық мәслихатының төрағасы Кәдірбек Омаров және Балқаш аудандық Қоғамдық кеңесінің төрағасы Бақытжан Хамзин сапарлас болды.
Бақ дарыған Балқаш өңірінде 43 тыл ардагері болса, аудан әкімі Азат Үкітайұлы 7 ардагерді арнайы құттықтады.
Атап айтсақ, ол Бақбақты ауылындағы тыл ардагері Әсия Нөкерқызы, Ақкөл ауылындағы Қабдығали Абжанов пен Ұлтай Дүйсекованы, Ақдала ауылдық округінің тұрғыны Әттай Ыбаеваны, Бояулы ауылындағы Мырзакүл Сабекованы, сонымен қоса аудан орталығында тұратын тыл еңбеккерлері Рәкүл Елеусізова мен Балқаш ауданының Құрметті азаматы Айтжан Есімовтың шаңырағына барып, оларды Ұлы Жеңіс күнімен құттықтады.
Сондай-ақ Балқаш ауданының әкімі Азат Үкітайұлы тыл ардагерлеріне құрмет көрсету барысында өз сөзінде олардың ел басына күн туған сұрапыл соғыс жылдарындағы төзімділігі мен табандылығының кейінгі ұрпаққа үлгі-өнеге екенін және ерен ерліктің тек майдан даласында ғана емес, тылдағы адал еңбекте де көрініс тапқанын баса айтты.
Ұлы Отан соғысының ардагерлері – батырлық пен отансүйгіштіктің мәңгілік символы болса, ал тыл еңбеккерлері күн-түн демей жұмыс істеп, Жеңіс күнін жақындатуға өлшеусіз үлес қосты. Олар егіс даласында еңбек етіп, зауыттарда қара жұмыс істеп, майданды азық-түлікпен, киім кешекпен және басқа да қажетті заттармен қамтамасыз етіп отырды. Ерлік ешқашан ұмытылмайды.
Алтынай СЕЙТКЕН
Балқаш ауданы
