Қонаев қалалық Мәдениет үйінде «Dameli Company» ЖШС-ның №4 жағажайда жүзеге асырылатын инвестициялық жобасы бойынша қоғамдық тыңдау өтті. Басқосуға Қонаев қаласының «Рауан» шағынауданы тұрғындары, қоғам белсенділері, мәслихат депутаттары және сала мамандары қатысты.
Бұған дейін «Рауан» шағынауданының жұртшылығы жағажай аумағында қонақ үй салынуына наразы болған еді. Осыған байланысты ұйымдастырылған қоғамдық тыңдауда «Dameli company» ЖШС өкілдері тұрғындардың ұсынысынан кейінгі өзгеріс енгізген жаңа жобаны таныстырды. Инвесторлардың айтуынша, жер учаскесі мемлекеттен жалға алынады. Жоба жүзеге асқанда бунгало, мейрамхана және шағын сәулеттік нысандар орналасады. Сонымен қатар жағажайда құтқарушылар мұнарасы, бейнебақылау камералары мен жаяу жүргіншілер жолы салынып, демалыс орындары ретке келтіріледі. Сондай-ақ 20 адамды тұрақты жұмыспен қамту жоспарланып отыр.
– Біздің мақсат – Қонаев қаласының туристік әлеуетін арттырып, жағажай аумағын заман талабына сай абаттандыру. Жобаға 650 млн теңге инвестиция салынады. Ең бастысы – жағажай тұрғындар үшін ашық болып қала береді. Демалушылар су қоймасына бұрынғыдай еркін өте алады. Жоба аясында қазірдің өзінде шомылу маусымына дайындық басталды, – деді компания өкілі Думан Зейтенов.
Қалалық ақсақалдар кеңесінің төрағасы Базарбай Оралбаев, облыстық мәслихат депутаты Сергей Горяной қалалық мәслихат депутаты Айман Рақышева мен шағынаудан тұрғындары ұсыныс-пікірлерін ортаға салды.
Қоғамдық тыңдау қорытындысында жағажай аумағында қонақ үй салынбайтыны айтылып, жиналған жұртшылық өзгеріс енгізілген инвестжобаның жүзеге асуын бірауыздан мақұлдады.
Айжарық Көптілеуов
