Жамбыл ауданындағы Үңгіртас ауылының тұрғындары «Таза Қазақстан» экологиялық бағдарламасы аясындағы тазалық акциясына ұйымшылдықпен қатысты. Осы ауылдың жанындағы жота туристер көп келетін орынға айналғалы біраз жылдың жүзі болған. Себебі ол жер «Жер кіндігі» аталып кеткен.
Жүзге жуық тұрғын сол маңда тазалық жұмыстарына біркісідей жұмылды. Үңгіртас ауылдық округінің әкімі Дәурен Әбдуәлиевтің ұйымдастыруымен олар киелі жер саналатын жотаға барып, белгіленген туристік бағыт бойымен жүріп отырып, аумағын қоқыстан тазартты. Мұнда жан-жақтан саяхатшылар жиі келеді. Алайда кейбір жауапсыз адамдар артына қоқыс тастап кетеді. Сенбілікке қатысқандар бірнеше сағат бойы сол қалдықтарды жинастырды. Жотадағы үңгір, жол бойы, «Жер кіндігі» деп жазылған орын маңы тазаланып, еріктілер 20 қаптан астам қоқысты арнайы күресінге жөнелтті.
Акцияға жастармен бірге аудандық және ауылдық округ әкімдігінің қызметкерлері, облыстық және аудандық мәслихат депутаттары, ақсақалдар, мектеп мұғалімдері, белсенді тұрғындар қатысты. Шараға қатысқан аудандық ішкі саясат бөлімінің басшысы Айткүл Медеуова ауылдарда атқарылып жатқан тазалық жұмыстарының маңыздылығын атап өтті. Оның айтуынша, бұл жұмыстар әр сенбі сайын барлық елдімекенде жалғасын тауып отыр. Басты мақсат – аудан аумағын таза ұстап, жасыл желекке айналдыру екенін айтты.
Серік САТЫБАЛДИЕВ
Жамбыл ауданы
