Жаз маусымы басталысымен балмұздаққа деген сұраныс арта түсетіні белгілі. Әсіресе, тұтынушылар арасында құйылмалы балмұздақ кеңінен танылған. Ол фризер құрылғысында дайындалып, қатты мұздатылмаған күйінде сатылады. Осы өнімге қойылатын санитариялық-эпидемиологиялық талаптар сақталмаған жағдайда түрлі ішек инфекциясына, соның ішінде сальмонеллез ауруына ұшыратуы мүмкін.
Ағзада патогендік бактериялар көбейсе, адамның дене қызуының көтерілуіне, іштің өтуіне, жүрек айнуына және жалпы улану белгілеріне әкеледі. Егер балмұздақ пішінін жоғалтса, онда ол бірнеше рет ерігенін білдіреді. Түстері әртүрлі балмұздақ сап-сары немесе өте қызыл болса, олар зиянды бояғыштарға толы болуы мүмкін.
Тұтынушыларға балмұздақты тек санитариялық талаптары сақталған сауда орындарынан алу ұсынылады. Өнімнің сыртқы көрінісіне, сақтау жағдайына, қаптамасының бүтіндігіне және жарамдылық мерзіміне мән берген жөн.
Құйылмалы балмұздақ сатып аларда өнімнің сапасы мен сатылу жағдайына дұрыстап қарау керек. Егер балмұздақ арнайы қасықпен салынса, оның тазалығына назар аударыңыз. Қасықтың ұзақ уақыт бойы суда тұруы санитариялық талаптарға сай емес, себебі мұндай ортада микробтардың көбею қаупі артады.
Өнімнің дәмін татып көргенде жағымсыз иіс сезілсе, құрамында ірі мұз кристалдары байқалса, мұндай балмұздақты сатып алудан бас тартқан жөн. Сондай-ақ өнімнің сыртқы түріне де мән беру қажет. Табиғи балмұздақ еріген кезде біркелкі бөлініп, қайта қатырылғанда өз құрылымын жоғалтуы мүмкін. Ал кескенде созылып, жабысқақ болып көрінсе, оның құрамында өсімдік майлары болуы ықтимал.
Тұтынушы өнімнің сыртқы көрінісіне ғана емес, оның сақталу жағдайына, сатушының тазалығына және жалпы сауда орнының санитариялық талаптарға сәйкестігіне назар аударуы тиіс. Сапалы өнім – денсаулық кепілі.
Бексұлтан Оспанов,
Талғар аудандық санитариялық-эпидемиологиялық бақылау басқармасының басшысы