Іле ауданының аумағында орналасқан «ECOBUS QK», «Gold Terra Expedition» ЖШС мен бірқатар жеке меншіктегі жер учаскелерінде ұзақ уақыт бойы құрылыс және тұрмыстық қалдықтарды заңсыз төгу дерегі тіркелді. Осы мәселе бойынша аумақтың санитарлық жағдайына және табиғи қоқыс үйінділерінің қоршаған ортаға кері әсеріне алаңдаған жақын маңдағы елдімекендердің тұрғындары бірнеше рет жергілікті атқарушы органдарға жүгінген.
Жер учаскелерін тиісті санитарлық жағдайда ұстау олардың иелері мен жер пайдаланушыларының міндеті болып саналатынына қарамастан, Өтеген батыр ауылдық округінің әкімдігі оның салдарын жою мақсатында бірнеше мәрте шара қабылдаған. Соңғы уақытта мамандандырылған техниканы тарта отырып, аумақты тазалау және қоқысты шығару бойынша жұмыстар кемінде үш рет ұйымдастырылған. Сонымен қатар жер учаскелерінің иелеріне стихиялық қоқыс орындарын жою және аумақтарды жер, экологиялық әрі санитарлық заңнама талаптарына сәйкестендіру қажеттігі жөнінде ресми хабарламалар жолданған.
Бұдан бөлек, тиісті материалдар Алматы облыстық экология департаментіне, Жер ресурстарын басқару департаментіне, прокуратура және полиция органдарына тексеру жүргізіп, құзыреті шегінде шара қабылдау үшін жіберілген.
Қазіргі уақытта уәкілетті мемлекеттік органдармен бірлесіп, қосымша бақылау тетіктері пысықталуда. Оның ішінде қоқыс жиі төгілетін аумақтар мен кіреберіс жолдарға бейнебақылау құралдарын орнату мәселесі қарастырылып жатыр.
Алматы облыстық тұрғын үй-коммуналдық шаруашылығы және абаттандыру басқармасының басшысы Димаш Қожабековтің айтуынша, басты мақсат – тек қана салдарын жою емес, сонымен қатар өз жер учаскелерін күтіп ұстау бойынша шара қабылдамайтын меншік иелері мен қалдықтарды заңсыз төгетін тұлғалардың жауапкершілігін қамтамасыз ету.
– Бүгінде біз барлық қажетті материалдарды құзырлы органдарға жолдадық. Жер учаскелерінің ластануына жол берген азаматтар мен ұйымдарды жауапкершілікке тарту бағытында жұмыс жалғасады. Әрбір тұрғын мен кәсіпкер қоршаған ортаға ұқыпты қарап, тазалықты өзінен бастауы қажет. Бұл – «Таза Қазақстан» бағдарламасы аясында тұрақты түрде көтеріліп келе жатқан маңызды мәселе, – деді Димаш Қожабеков.
Әрбір анықталған құқық бұзушылық фактісіне құқықтық баға беріліп, тексеру нәтижесінде кінәлі тұлғаларға заңнамада көзделген жауапкершілік шаралары қолданылады.
