Қонаев қаласында Балаларды қорғаудың халықаралық күніне арналған дәстүрлі ашық облыстықбалалар футбол турнирі басталды. Төртінші рет ұйымдастырылып отырған бұл жарыс жас футболшыларды бір алаңға жинап, олардың спорттық қабілеттерін көрсетуіне мүмкіндік тудырды.
Биылғы турнирге Алматы облысының аудандарынан, сондай-ақ Түркістан және Жамбыл облыстарынан келген 2014 жылы туған жас футболшылар қатысуда. Жалпы саны 8 команда мен 150-ден астам жас спортшы бақ сынауда.
Мерекелік көңіл күй алғашқы минуттардан-ақ сезілді. Музыка әуені мен көрермендердің қошеметімен командалар салтанатты түрде алаңға шығып, оларды құрметті қонақтар, жаттықтырушылар, ата-аналар мен жанкүйерлер қарсы алды. Ашылу салтанаты жарқын концерттік бағдарламамен жалғасып, ұйымдастырушылар дайындаған тәтті сыйлықтар жас спортшылар үшін ерекше тосынсый болды.
«Бүгінде балаларымыздың спортпен шұғылданып, жан-жақты дамуына барлық қажетті жағдай жасалып жатыр. Жаңа спорт нысандары салынып, балалар мен жасөспірімдер спорты қарқынды дамуда, түрлі жарыстардың саны артып келеді. Ең бастысы – балалардың өздерінің еңбектенуге, дамуға және алға ұмтылуға деген ынтасы. Біз жас футболшылардың алаңға үлкен құлшыныспен шығатынын көріп қуаныштымыз. Қонаев қаласындағы бұл турнир өңірдегі балалар футболының қарқынды дамып келе жатқанын тағы бір мәрте дәлелдейді. Сонымен қатар спортты жан-тәнімен сүйетін, талантты әрі мақсаткер жаңа буын қалыптасып келеді» – деді Алматы облыстық дене шынықтыру және спорт басқармасының өкілі Құдайназар Бердіханов.
Қатысушылардың жасы кіші болғанымен, алаңда нағыз футбол тартысы қыза түсті. Бұл жас ерекшелігі санатында нәтижеден бұрын ойын дағдыларын жетілдіруге, техникалық шеберлікті арттыруға, командалық ойлауды қалыптастыруға және спортқа деген сүйіспеншілікті дамытуға ерекше назар аударылады.
«Жыл сайын қатысушылардың деңгейі артып келеді. Көптеген балалар жақсы техникаға, ойындық ойлауға және жеңіске деген үлкен құлшынысқа ие. Мұндай жарыстар балалар үшін үлкен тәжірибе мектебі. Олар нағыз турнир атмосферасын сезініп, толқуды жеңуге және өздерінің ең жақсы қасиеттерін көрсетуге мүмкіндік алады. Футболдың еліміздің әр өңірінен келген балаларды біріктіретіні өте маңызды», – деді футболдан облыстық мамандандырылған балалар-жасөспірімдер спорт мектебі директорының орынбасары Ернар Нұрланов.
Жас футболшылардың өздері де турнирге қатысудың олар үшін үлкен оқиға екенін айтады. Бастапқы матчтағы жеңістен кейін ойыншылардың бірі өз әсерімен бөлісті.
«Мен футболды өте жақсы көремін және болашақта кәсіби футболшы болуды армандаймын. Мұнда мықты командалар, қызықты ойындар және жаңа достар көп. Біз турнирге ұзақ дайындалдық және жақсы нәтиже көрсетуге тырысамыз» – деді Қонаев қаласы командасының ойыншысы Нұртас Омархан.
Турнир матчтары 6 маусымға дейін жалғасады. Осы күні финалдық ойыннан кейін жеңімпаздар мен жүлдегерлерді марапаттау рәсімі өтеді. Үздік командалар мен ойыншылар кубоктармен, медальдармен, дипломдармен және естелік сыйлықтармен марапатталады.
