Есірткінің заңсыз айналымына қарсы күрес және жастардың денсаулығын қорғау – мемлекет пен қоғам алдында тұрған маңызды міндеттердің бірі. Есірткіге тәуелділік жеке адамның өмірі мен денсаулығына ғана емес, отбасының берекесіне, қоғамдық қауіпсіздікке және елдің болашағына да зор қауіп төндіреді. Сондықтан жастар арасында зиянды әдеттердің алдын алу, салауатты өмір салтын насихаттау және құқықтық мәдениетті қалыптастыру бағытындағы жұмыстар жүйелі түрде жүргізілуде.
Осы мақсатта Балқаш ауданында жастардың есірткіге қарсы иммунитетін қалыптастыруға бағытталған түрлі профилактикалық іс-шаралар ұйымдастырылып келеді. Білім беру ұйымдарында дәрістер, ашық кездесулер, пікірталастар мен семинарлар өткізіліп, құқық қорғау органдарының қызметкерлері, дәрігерлер, психологтар және сала мамандары жасөспірімдерге есірткінің адам ағзасына, психикасына және әлеуметтік өміріне тигізетін зиянын жан-жақты түсіндіреді. Сонымен қатар спорттық жарыстар, мәдени-көпшілік іс-шаралар мен жастар акциялары арқылы белсенді әрі салауатты өмір салтын ұстанудың артықшылықтары кеңінен насихатталуда.
Бүгінде есірткінің жаңа түрлері мен синтетикалық психобелсенді заттардың таралу қаупі артып келеді. Әсіресе әлеуметтік желілер мен мессенджерлер арқылы заңсыз есірткі жарнамасының таралуы, оңай табыс табуға шақыратын күмәнді ұсыныстар жастар үшін үлкен қауіп төндіреді. Осыған байланысты тұрғындарға интернет кеңістігінде сақ болу, күмәнді сілтемелерге өтпеу, заңсыз әрекеттерге қатыспау және мұндай фактілер анықталған жағдайда олар туралы құқық қорғау органдарына дереу хабарлау қажеттігі түсіндірілуде.
Есірткінің заңсыз айналымына қарсы күресте әрбір азаматтың белсенді азаматтық ұстанымы ерекше маңызға ие. Ата-аналардың балаларымен ашық әңгімелесуі, олардың бос уақытын тиімді ұйымдастыруы және қоршаған ортасына назар аударуы құқық бұзушылықтардың алдын алуға ықпал етеді. Ал білім беру ұйымдары, мемлекеттік мекемелер мен қоғамдық ұйымдардың бірлескен жұмысы жастарды теріс әрекеттерден қорғаудың тиімді тетігі болып табылады.
Салауатты өмір салтын насихаттау, спортпен тұрақты айналысу, білім мен еңбекке ұмтылу – жастарды зиянды әдеттерден сақтайтын басты құндылықтар. Денсаулығы мықты, саналы әрі жауапкершілігі жоғары ұрпақ тәрбиелеу – еліміздің тұрақты дамуының негізі. Сондықтан есірткіге қарсы күрес – тек құқық қорғау органдарының ғана емес, бүкіл қоғамның ортақ міндеті әрі «Заң мен Тәртіп» қағидатын орнықтырудың маңызды бағыттарының бірі.
Алтынай СЕЙІТКЕН