Әр адамның өз құқықтары мен бостандықтарын білуі – құқықтық сауатты қоғам қалыптастырудың маңызды алғышарты. Бұл тұрғыда Конституцияның орны ерекше. Себебі Ата Заң азаматтардың негізгі құқықтарын бекітіп қана қоймай, олардың қорғалуына мемлекеттік кепілдік береді.
Қазақстан азаматының өмір сүруге, білім алуға, еңбек етуге, медициналық көмек алуға, өз ойын еркін білдіруге және заңда белгіленген өзге де құқықтарды пайдалануға мүмкіндігі бар. Алайда құқықты пайдалану басқа адамдардың құқықтары мен бостандықтарына нұқсан келтірмеуі тиіс.
Кейде азаматтар өз құқықтарының бұзылғанын байқаса да, оны қалай қорғау керектігін білмей жатады. Сондықтан құқықтық сауаттылықты арттырудың маңызы зор. Мемлекеттік органдардың жұмысы, сотқа жүгіну тәртібі, өтініш беру мүмкіндіктері туралы қарапайым әрі түсінікті ақпараттың қолжетімді болуы азаматтардың заңды жолмен әрекет етуіне мүмкіндік береді.
Өз құқығын білетін адам заңсыздыққа немқұрайлы қарамайды. Сонымен қатар ол өз міндеттерін де жақсы түсінеді. Құқық пен міндеттің қатар жүруі – өркениетті қоғамның басты белгілерінің бірі.
Ата Заңды білу – тек мерекелік күндерде еске алатын ұғым емес. Конституциялық нормаларды күнделікті өмірде басшылыққа алу – әр азаматтың құқықтық мәдениетінің көрсеткіші.
Әсемгүл ЕЛЕУСІЗҚЫЗЫ, №3 Кеңес Нүрпейісұлы
атындағы орта мектептің бастауыш сынып мұғалімі.
Кеген ауылы