Құрылтай сайлауы күні белгілі театр және кино актері, Қазақстанның еңбек сіңірген қайраткері, «Құрмет» орденінің иегері Болат Әбділманов Қарасай ауданы Жандосов ауылындағы №470 сайлау учаскесіне барып, өз таңдауын жасады.
Сахнада көптеген жарқын образдарды, оның ішінде тарихи тұлғалар мен ұлы Абай бейнесін сомдаған өнер қайраткері дауыс беру арқылы өзінің азаматтық ұстанымын білдірді.
«Сахнада біз әрдайым шындық пен рухани тазалықты іздейміз. Ал Құрылтай сайлауы – әр азамат өз ұстанымын білдіріп, елдің болашағына қатысты таңдау жасайтын маңызды сәт. Бүгін мен мемлекетіміздің тұрақтылығы, ұлттық мәдениетіміздің дамуы және ұрпағымыздың жарқын болашағы үшін өз таңдауымды жасадым», – деді Болат Әбділманов.
Белгілі мәдениет қайраткерінің сайлауға қатысуы азаматтық жауапкершілік пен ел болашағына бейжай қарамаудың үлгісі ретінде атап өтілді.
Әр таңдау маңызды. Ел болашағы әр азаматтың ұстанымынан басталады.