Қауіпсіз қоғам дегеніміз — тек құқық бұзушылық аз тіркелетін орта емес. Ол — тұрғындары кешкісін көшеде алаңсыз жүретін, баласын мектепке жібергенде уайымдамайтын, ал көршісінің басына қиындық түссе, сырт айналмайтын қоғам.
Қоғамдық қауіпсіздікті қамтамасыз ету тек полицияның міндеті деген түсінік әлі де кездеседі. Алайда тәртіпті сақтау мен құқық бұзушылықтың алдын алу — мемлекет пен азаматтардың ортақ жауапкершілігі. Полиция заң талаптарының орындалуын қамтамасыз етсе, тұрғындар өз ортасындағы мәселелерді дер кезінде байқап, тиісті орындарға хабарлау арқылы қауіптің алдын алуға үлес қоса алады.
Мәселен, көпқабатты үйдің ауласында жарықтандыру жеткіліксіз, балалар алаңындағы құрылғылар сынған немесе тұрғындар жиі жиналатын жерде бұзақылық орын алса, мұны қалыпты жағдай деп қабылдауға болмайды. Мұндай мәселелерді тұрғындар бірлесіп көтеріп, ПИК немесе басқарушы компанияға, әкімдікке және қажет болғанда полицияға хабарлай алады.
Қоғаммен әріптестіктің тағы бір маңызды тұсы — сенім. Тұрғындар өздері көрген құқық бұзушылық туралы қорықпай хабарлай алуы керек. Ал әрбір хабарламаға заң аясында назар аударылып, азаматтарға түсінікті кері байланыс берілуі маңызды.
Әсіресе, жастармен жұмыс істеу, мектептерде құқықтық түсіндіру шараларын өткізу, аула мен қоғамдық орындардағы қауіпсіздік мәселелерін бірлесіп шешу — алдын алу жұмысының маңызды бөлігі.
Заң мен тәртіп қағидаты тек айыппұл салу немесе жаза қолданумен шектелмеуі керек. Оның негізгі мақсаты — құқық бұзушылықтың алдын алу, адамның құқығын қорғау және қауіпсіз орта қалыптастыру.
Қауіпсіздік бір күнде орнамайды. Ол күнделікті мәдениеттен, жауапкершіліктен және бейжай қалмаудан басталады. Әр тұрғын өз ауласына, көшесіне және айналасындағы адамдарға жауапкершілікпен қараса, қоғамдық қауіпсіздік те нығая түседі.
Тоғжан ЖОЛДЫҒАЛИ