Ойнақы әуен, сәбилердің шат күлкісі және ата-аналардың қуанышты жүзі… «All ability Camp» ерекше балаларға арналған спорттық лагерінің екінші маусымының жабылуында орнаған шаттық ауаны осындай.
Қапшағай су қоймасының жағасында орналасқан «Heaven club» демалыс базасында ерекше қажеттілігі бар балалар мен олардың ата-аналары демалыс күндерін естен кетпестей көңілді өткізді. Шаттыққа толы шараны «ДЦП-life» орталығы ұйымдастырды. Балалар орталығына «Samruk-Kazyna» корпоративтік қоры екінші жыл қатарынан қолдау көрсетіп келеді. Демалушылар жазғы күннен қуат алып қана қоймай, өздері үшін жаңа мүмкіндіктер көкжиегін ашуға және әлемге басқаша қарауға мүмкіндік алды.
Өткен жылғыдай, спорттық лагерь биыл да Қазақстанның барлық өңірінен келген, 10 мен 18 жас аралығындағы 200-ден астам ерекше қажеттілігі бар балаларды жазғы демалыспен қамтамасыз етті. «ДЦП-life» орталығының басшысы Зәуре Итенованың айтуынша, мұнда олар бір апта бойына бочча, адаптивтік теннис және футбол, корнхол және садақ ату сияқты спорт түрлерімен танысты. Бұл жоба тек балаларға қолдау көрсетіп қана қоймай, тренингтер мен семинарлар арқылы олардың ата-аналарына да өмірге құлшыныстарын арттыруға бағытталған.
Жүз елу бала мен ата-ана және еріктілер бес командаға бөлінген. Әрқайсысына «Теңіз мысықтары», «Кунг-фу Панда», «Жалынды жүректер», «Жасыл беде» және «Үйректер» деген атаулар берілді. Дәстүр бойынша түрлі спорттық турнирлер, байқаулар мен сауалнамалар ұйымдастырылды. Жарысқа қатысушыларға грамоталар мен естелік сыйлықтарды «Samruk-Kazyna Trust» корпоративтік қоры бас директорының орынбасары Досбол Көшербаев табыстады. Ол балалар мен ата-аналарды маусымның аяқталуымен құттықтап, мықты денсаулық тіледі.
Ұйымдастырушылардың, демеушілердің және еріктілердің аттарына ата-аналар да алғыс білдірді.
Ұйғыр ауданы Тасқарасу ауылынан келген Адалятхан Илахунова: «Мен мұнда 16 жасар ұлыммен келдім. Оның диагнозы – ДЦП. Бұл жерде біз мейірімділік пен қамқорлыққа бөлендік. Осы демалыс күндерінде қасымыздан әр нәрсеге көмек беріп жүрген еріктілер кеткен емес. Басқа балалармен бірге біз де спортпен, сурет салумен, жүзумен айналыстық, түрлі тренингтерге қатыстық. Қысқасы, жақсы әсер алып, қуат жинадық, – деді.
Ұйымдастырушыларға деген ыстық лебізін Астана қаласынан келген 12 жасар Инсар Базыл да ақтарды.
Лагерьде маған қатты ұнады. Біз спортпен айналыстық, сурет салдық. Бұл жерден мен көптеген дос таптым, – деді.
Балалар лагерінің жұмысына үлкен үлес қосқан еріктілер рөлін де ерекше атап көрсеткен жөн. Олар тәулік бойы қызмет көрсетті. Алматыдан келген Арнай Әбітай:
– Менің еріктілер қатарында жүргеніме екінші жыл болды. Әр маусымда әртүрлі диагнозбен келген балаларды қараймын. Бұл өте күрделі еңбек, өйткені әрқайсысының тілін табуың керек. Бала тағдыры туралы қандай да бір өмірбаянды тыңдау психологиялық тұрғыдан өте ауыр, – дейді. Оның өзінің де ДЦП-дан жапа шегіп жүрген егіз сіңлісі бар.
Іс-шараның қорытындысында ерекше қажеттіліктері бар балалар шағын концерт ұйымдастырды. Сондай нөмірлердің бірінде олар осы жаздың хитіне айналған «Я подарю тебе ландыши» әнін орындады. Сонымен қатар өзі жазған «Бақыт» деген өлеңін оқыған Іңкәр Әбітайға жұрт үлкен ризашылықпен қол соқты.
Бейбіт МЕКЕЕВ
Қонаев қаласы
