Облыс әкімдігінің қолдауымен ішкі саясат басқармасы және қоғамдық даму мен келісім орталығы ұйымдастырған «Шаңырақ» шығармашылық байқауы биыл қасиетті Қарадала төсінде өтті. «Алма парк» демалыс аймағында ұйымдастырылған шараға барлық аудандардан қатысушылар мен қонақтар арнайы келді.
«Шаңырақ» байқауының негізгі мақсаты – этножурналистика саласына қалам тербеп жүрген тілшілердің шығармаларын бағалай отырып, көпэтносты еліміздің татулығы мен тұрақтылығының артуына айтарлықтай үлес қосу. Байқаудың ережесіне сәйкес, үміткер материалын алдын ала ұйымдастырушыларға жолдауы қажет. Олар қазылар алқасының толықтай сараптамалық-талдамалық тексеруінен өтіп, әділ бағаланады.
Шараның алғысөзі облыстық ішкі саясат басқармасы этносаралық қатынастарды дамыту бөлімі – Қазақстан халқы Ассамблеясы хатшылығының басшысы Салтанат Нұрахметоваға берілді. Ол аталған байқаудың еліміздің этносаяси саласындағы маңызы мен қоғамдық тұрақтылық бағытындағы рөлі жөнінде айта келе, барша қатысушыларға сәттілік тіледі.
Шығармашылық жарысқа «Огни Алатау» газетінің бас редакторы Забира Сайдильдина, облыстық ҚХА жанындағы жетекші журналистер клубының төрағасы, «Жетісу» телеарнасының журналисі Гүлжан Қызайбай, «Алатау арайы» газеті бас редакторының орынбасары Болат Мәжит қазылық етті. Шара барысында Алматыдағы «UIB» халықаралық бизнес университетінің аға оқытушысы, журналистика саласындағы «Сөйлеу техникасы» методикасының авторы Толқын Сайдуова «Еркін сөйлеу» атты тақырыпта тренинг өткізді.
Сонымен байқаудың қорытындысы бойынша, үшінші орынды
«Аlataunews.kz» ақпараттық агенттігінің тілшісі Мөлдір Иманмәди, Сүлеймен Демирел университеті журналистика факультетінің студенті Диана Қанатова, облыстық «Алатау арайы» газетінің бөлім редакторы Айжарық Көптілеуов және Ұйғыр аудандық «Қарадала тынысы» газетінің жауапты хатшысы Баян Мамырбаева иеленді. Ал облыстық «Огни Алатау» газетінің журналисі Фатима Ержанова мен «Жетісу» телеарнасының тілшісі Надежда Белова екінші орынға табан тіреді. Облыстық «Алатау арайы» газетінің Еңбекшіқазақ ауданындағы меншікті тілшісі Құралай Мұратқызы байқаудың бірінші орын иегері атанды. Қалған қатысушылардың да еңбегі ескеріліп, ынталандыру сыйлықтарымен марапатталды.
Анар ДүйсенбаЙқызы
Ұйғыр ауданы
