Ұлы Отан соғысының ардагері, 101 жастағы қазына-қарт Алим Кебиров те бүгінгі референдумда өз таңдауын жасады. Ұйғыр ауданының Бахар ауылында тұратын ақсақал – Ұлы Отан соғысынан аман-есен елге оралып, ел экономикасының дамуына да үлес қосқан қария. Бүгінде Ұйғыр ауданындағы жалғыз соғыс ардагері.
Бахар ауылында орналасқан №921 дауыс беру учаскесінің комиссия мүшелері Алим Кебиров атамыздың үйіне барып, өз таңдауын жасатты. Көзі қарақты, күнделікті жаңалықтан хабардар атамыз келген комиссия мүшелеріне ризашылығын білдіріп, мемлекет басшысының әрбір бастамасына қолдау білдіретінін айтты. «Атом электр стансасы елімізге қажет. Бізге жарық керек, даму керек. Сондықтан бөлінбей, бір кісідей президентімізге қолдау көрсетейік. «Бөлінгенді бөрі жейді» дейді. Ел ішінде ауызбіршілк болмаса, ұрыс-керіс болса, дамымаймыз. Біз соғысты да көрдік. Небір қиын кезеңдерді басымыздан өткердік. Қазір, шүкір, бейбіт заманда отырмыз. Енді соның қадірін білейік, балаларым», – деп ғасыр жасаған қария ақ батасын да берді. Елімізде болып жатқан оң өзгерістерге көңілінің толатынын айтты. Сонымен қатар бүгінгі тарихи сәттің сәтті өтуін тіледі.
