Облыста тауар нарығындағы бәсекелестік жағдайы тұрақты зерттеледі. Бұл туралы облыстық Қазақстан Республикасы Бәсекелестікті қорғау және дамыту агенттігі облыс бойынша департаментінің өкілдері өңірлік коммуникация алаңында мәлімдеді.
Бәсекелестікті қорғау және дамыту агенттігі – бәсекелестiктi қорғау және монополистік қызметтi шектеу саласында басшылықты, мемлекеттік монополия саласына жатқызылған қызметті бақылау мен реттеуді, сондай-ақ, тауар биржалары саласындағы қызметті мемлекеттік бақылауды және лицензиялауды жүзеге асыратын мемлекеттік орган. Агенттіктің негізгі міндеті – бәсекелестік орта құрып, барлық кәсіпкерлер үшін тең мүмкіндіктер жасау, нарықтарды монополиялауды тоқтату. Департаменттің жұмысы мынадай негізгі бағыттардан құралады: тауар нарықтарындағы бәсекелестіктің жай-күйін зерделеу, монополияға қарсы заңнаманы бұзу бойынша тергеп-тексеру жүргізу, тауар нарықтарындағы анықталған кедергілерді жою жөніндегі жұмыс.
Бірінші бағыт бойынша 2022 жылы облыстағы тауар нарығына 24 кешенді сараптама жасалған. Зерттеулер нәтижесінде монополияға қарсы заң нормаларын бұзғаны үшін 10 ескерту берілген. Облыста табиғи газға ауысу науқаны қызып тұрғандықтан құрылыс материалдарының бағасында да тұрақсыздық байқалады. Бәсекелестікті қорғау агенттігінің өкілдері кешенді түрде жұмыс істеп, абоненттерді орталық газбен қамту желілеріне қосу құнын 450-500 мың теңгеден 350 мың теңгеге дейін арзандатқан. Сондай-ақ, 2022 жылы домофон, медициналық қызметтер, қант өндірісі мен саудасы, мектепке дейінгі білім беру және көмір сату бойынша монополияға қарсы комплаенстің 15 сыртқы жағдайы қаралған. Нәтижесінде, медициналық қызметтердің бағасы 5-тен 10 пайызға дейін төмендетілді.
Нарық субъектілері монополияға қарсы заңнаманы бұзған жағдайда бәсекелестікті қорғау мақсатында ескерту беріледі. Бұдан бөлек, айыппұл салынады және монополия жолымен түскен кіріс тәркіленеді. Осылайша, 2022 жылы аталған департамент монополияға қарсы заңнаманы бұзғандарға қатысты 9 тергеуді аяқтап, 6 әкімшілік іс қозғаған. Оларға монополиялық кірісті тәркілеу барысында 6 миллиард теңгеден астам айыппұл салынды.
Осы жылы 20-дан астам тауар нарығындағы бәсекелестіктің жай-күйін зерделеу жоспарланған.
Баян Мұратбекқызы,
Қонаев қаласы
