Ұлт аманатын арқалаған жастарды патриоттық рухта тәрбиелеу – маңызды іс. Осыны басты назарға алған ҰҚК Шекара қызметі Алматы облысы бойынша департаментінің басшылығы орта білім шаңырақтарымен тығыз қарым-қатынас орнатып, ықпалдаса жұмыс істеуді жолға қойған. Аталған департаменттің оқу базасында алғаш рет өткен «Жас шекарашы» әскери-патриоттық эстафетасы – соның айқын дәлелі.
Алматы қаласы Наурызбай ауданындағы №12 орта мектептің 10-11-сынып оқушылары арасындағы сайысқа департамент бастығы, полковник А.Каюпов бастаған мәртебелі қонақтар қатысты. Еліміздің Әнұранымен басталған шарада алғашқы сөз тізгінін алған ҚР Парламенті Мәжілісінің депутаты Айдос Сарым қазіргі уақытта әскери-патриоттық тәрбиеге қатысты жаңа заң жобасы жазылып жатқанын, ол жыл соңына дейін қабылданатынын тілге тиек етті. «Осы жобаға сәйкес бүгінге дейін еліміздегі мектептерде «Жас шекарашы», «Жас сарбаз» сияқты әскери-патриоттық сыныптар ашылып, оқушылар әскери дайындықтарын шыңдауда», – деп депутат жас патриоттарға сәттілік тіледі.
– Осындай сайыстар жастардың әскери мамандыққа деген көзқарасын өзгертеді. Олар әскердегі ағаларына қарап сап түзейді. Сондықтан бүгінгі шараның маңызы зор, – деп «Генералдар кеңесі» республикалық қоғамдық бірлестігінің төрағасы, генерал-лейтенант Б.Сәрсеков сөзін түйіндеді. Бұдан әрі өз мектептерінің намысын қорғауға тас-түйін болып келген командалар дайындаған сахналық көріністер шекарашылар назарына ұсынылды.
Жиналған көпшілік ҚР ҰҚК Шекара қызметінің кинологтары машықтандырған із кесуші иттердің өнеріне тәнті болды. Кинологтардың шеберлік дәрісі аяқталған соң, кезек Қарасай ауданы бойынша шекара басқармасының арнайы мақсаттағы ұтқыр іс-қимылдар тобына берілді. Сайыпқырандардың самдағайлығы болашақ Отан қорғаушылардың делебесін қоздырды.
Кезек эстафетаға да келіп жетті. Атап айтар болсақ, командалар қаруды шашып, қайта жинау, 25 метрлік қашықтыққа газтұмылдырықпен және оқ өтпейтін сауытпен жүгіру, жаралыға алғашқы медициналық көмек көрсету, қиын өткелдерден өту арқылы қарудан нысанаға дәл тигізу, белтемірге тартылу секілді күрделі жаттығуларды орындады.
Жарыс қорытындысы бойынша, бас жүлдені Рахым Сәрсенбин атындағы №192 орта мектеп командасы иеленді. І орынды №174 мектеп-гимназиясы, ІІ орынды №208 орта мектеп жеңіп алса, ІІІ орын №187 білім шаңырағының қанжығасына байланды. Жеңімпаздар бағалы сыйлықтар және грамоталармен марапатталды.
Тартысты өткен сайыс жас ұландардың әскери дайындықтары мықты екенін дәлелдеді. Отан деп бұлқынған патриоттардың өсіп келе жатқанын білдірді.
Тамара ДӘУЛЕТБАЕВА,
ҚР ҰҚК Шекара қызметінің запастағы подполковнигі
