Облыс әкімі Марат Сұлтанғазиев қытайлық «Xinjiang Yihongfeng Energy Technology Co., Ltd» компаниясының өкілдерімен кездесті. Онда екі тарап жылу сақтайтын және коррозияға қарсы құбырлар өндіретін зауыт құрылысының жобасын іске асыру жайын талқылады.
Ең алдымен аймақ басшысы қытайлық компания өкілдеріне өңірдің инвестициялық тартымдылығын айтып, ҚХР мен облыс арасында экономиканың түрлі салаларында бірлескен жобаларды іске асыруға қолайлы серіктестік қатынас қалыптасқанын атап өтті. Марат Елеусізұлы сондай-ақ облыста туризм, ауыл шаруашылығы және құрылыс секторларын белсенді дамытуға бағытталған инвестициялар екі тарапқа өзара тиімді ынтымақтастық үшін кең мүмкіндік беретінін жеткізді.
Өз кезегінде «Xinjiang Yihongfeng Energy Technology Co., Ltd» компаниясының бас директоры Ши Лэй кәсіпорынның нақты жағдайы мен мүмкіндігін баяндады. Оның сөзінше, кәсіпорын қытайдағы Іле-Қазақ автономиялық облысының елімізбен шекаралас Қорғас ауданына ірге тепкен. 2002 жылы құрылған кәсіпорын жылу сақтайтын және ауызсу, кәріз сулары мен сұйытылған газды тасымалдауға арналған құбыр өндіреді. Қазір аталған кәсіпорын жылына 10 мың тонна құбыр өндіруге қауқарлы. Компания жетекшісі облыс басшысына өз инвестициялық жобасы жайлы да айтып берді.
– Біз Алматы облысында жылына 130 мың тонна құбыр өндіретін зауыт салуды көздеп отырмыз. Жобаны жүзеге асыруға 139 млн доллар қаржы салмақпыз. Бұл экологиялық ортаға еш залалсыз өндіріс саналады. Жоба жүзеге асса, 150 адам тұрақты жұмыспен қымтылады. Сонымен қоса, қызмет өтеу мен тасымалдау жұмыстарына білікті мамандарды тартамыз. Әрине, бұл ауқымды жоба жергілікті әкімдіктің және өзге де құзырлы органдардың қолдауымен ғана жүзеге асады деп сенеміз, – деді компанияның бас директоры Ши Лэй.
Шетелдік компанияның мүмкіндігінен хабардар болған облыс әкімі инвестициялық жобаның тиімділігіне баса назар аударатынын айтты.
– Бүгінде Алатау және Қонаев қалаларының Бас жоспарына сәйкес, бізде көптеген әлеуметтік және коммерциялық нысандар бой көтермек. Осыған сай жаңа инфрақұрылым салумен ескісін жаңғырту жұмысы жалғасын табады. Сондықтан бізге сапалы құбылар аса қажет. Облысымызда бірнеше индустриялық аймақ бар. Соларды дамыту негізінде сіздер ұсынған инвестициялық жобаны жан-жақты саралайтын боламыз, – деді Марат Елеусізұлы.
Кездесу соңында «Xinjiang Yihongfeng Energy Technology Co., Ltd» мен «Аlatau» арнайы экономикалық аймағы» ЖШС арасында ынтымақтастық туралы меморандумға қол қойылды. Ал қытайлық компания өкілдері облыс әкімі мен сала мамандарын өз өндіріс желілерімен танысуға шақырды.
Ерзат АСЫЛ
