Еліміздің дамыған мемлекеттер қатарына қосылуы жастардың еншісінде екенін ескерсек, олардың сапалы білім алып, тәрбиелі, парасатты азамат болып қалыптасуында мектептің атқаратын қызметі зор. Табысты ұлт болудың маңызды шартының бірі – орта білімнің сапасы. Яғни әрбір оқушы жан-жақты дамуы үшін қолайлы жағдай жасалуы қажет. Осы орайда еліміздің білім саласында елеулі өзгерістер енгізілуде.
Аталған өзгерістің бірі – «Жайлы мектеп» ұлттық жобасы. Мемлекет басшысының бастамасымен қолға алынған жоба аясында мектептер ауылда да, қалада да жаңа бірыңғай стандарт бойынша салынып жатыр. Білім шаңырағы физика, химия, биология және робототехника пәндері бойынша заманауи кабинеттермен жабдықталады. Жобалық қуатына қарай бірнеше спортзал болады.
Былтыр бала қауіпсіздігі мен құқығын қамтамасыз ету мақсатында буллинг, кибербуллинг түсініктері заңнамаға енгізілген еді. Биыл алғаш рет баланың іс-әрекетіне ата-ананың әкімшілік жауапкершілігін заңмен бекіту жұмысы жүріп жатыр. 111 байланыс орталығы құрылып, құқықтық тұрғыдан көмек көрсетуді бастады. Алдағы уақытта ата-аналар комитетінің жұмысын трансформациялау көзделіп отыр.
Ауданда 5 балабақша, 15 мектеп жанындағы шағын орталық жұмыс істейді. Былтыр қазан айынан бастап аудан көлеміндегі барлық мектепке дейінгі ұйымдарда цифрландыру аясында тәрбиеленушілердің күнделікті келуін есепке алу мақсатында QR-кодпен түгендеу арқылы электронды табель жүргізілуде. Жобаның мақсаты – балабақшалар мен шағын орталық жұмысындағы жариялылықты, қызметкерлердің уақытын, мемлекет қаржысын үнемдеу. Бұл тәрбиешілер, медбикелер, ата-аналар үшін де тиімді болып отыр.
Айжан ДӘУІТОВА,
О. Жандосов атындағы орта мектеп
директорының оқу-әдістеме ісі жөніндегі орынбасары
Райымбек ауданы
