Күлімдеген шуақты көктеммен бірге қазақ даласына жер әлемді жайнатып, құстарды сайратып Ұлыстың ұлы күні келді. Осыған орай Кегендегі орталық алаңда «Наурызнама» аясында Ұлттық киім күні аталып өтті.
Іс-шараның мақсаты – салт-дәстүр мен мәдени мұраны сақтап, ұлттық киім үлгілерін көпшілікке насихаттау. Ұлттық киім киген бірқатар мекеме қызметкерлері, аудан тұрғындары мен оқушылар алаңға жиналып, көпшілікке мерекелік көңіл-күй сыйлады. Ақ жаулықты әжелер шашу шашып, ақсақалдар ақ тілегін ақтарды.
Мерекені жаңа форматта атап өткен аудан әкімі Нұрбақыт Теңізбаев:
– Бұл күні адамдар өздерінің мәдениеті мен тарихына, ата-бабаларына құрмет көрсету және өз мұраларын басқалармен бөлісу үшін ұлттық киім киеді. Оған жай киім ретінде емес, бүтін бір ұлттың бет-бейнесін айқындайтын мұра, сан ғасырлық тарихы бар көркем туынды деп қарауымыз керек, – деді.
Аудандық мәслихат төрағасы Алмасбек Нұғыман ұлттық киімді ұлықтауды ерте жастан балаларға түсіндіріп, оны күнделікті киіп жүруге дағдылансақ деген ниетін ортаға салды.
– Бүгін халық рухының кеңдігін, таңғажайып күйін бейнелейтін ұлттық киімнің дизайны мен көркемдігіне, қайталанбас өрнегіне тамсанып, одан шабыт алатын күн, – деген аудандық ақсақалдар алқасының төрағасы Сабыр Досымбеков жиналған көпшілікке батасын берді.
Мерекелік шарада ақ жаулықты аналар дайындаған сүт өнімдерінен жасалған құрт, ірімшік, май, қатық, наурызкөже және басқа да қолөнер бұйымдарының көрмесі ұйымдастырылды. Өнерлі жастар күмбірлетіп күй шертіп, көркем би, әсем әндерін тарту етті.
Дәурен ӘБУТӘЛІПОВ,
Кеген ауданы
